Buskeda pa mas hende a sigui Diaranson
ORANJESTAD (AAN): Autoridadnan di Wardacosta di Caribe Hulandes, a sigui cu e buskeda Diamars atardi y tambe Diaranson mainta pa e otro boto(nan) perdi, for di ora cu a tuma lugar un rescate riba lama grandi pazuid di isla di Curaçao.
Wardacosta a confirma cu Diaranson mainta for di ora cu solo a sali, nan a sigui cu e buskeda usando patronchi di zonanan riba lama pa mira si por haya mas hende y tambe mas boto.
Manera ta conoci, Diamars mainta, Centro di Operacion Maritimo (Centro MOC) di Wardacosta di Caribe Hulandes, a ricibi un notificacion urgente, cu un of mas boto a subi lama for di costa di Venezuela y tabata rumbo pa Curaçao, y cu nan tin varios persona indocumenta abordo.
Despues di a ricibi e notificacion aki, Centro MOC mesora a duna ordo pa e Helicopter di Wardacosta lanta vuelo, y a cuminza prepara e avion Dash-8 di Wardacosta tambe pa cuminza busca riba lama zuid di Curaçao.
Esaki a wordo haci tambe, y personal abordo di Helicopter y e Avion a keda vigila movimento riba lama.
Durante e buskeda, un contact a worde detecta riba Marine Radar door di personal di MOC. Mesora nan a duna e posibel localizacion na e avion Dash-8, cu a move mesora den e area ey. Asina a bin descubri cu un boto a bolter, y tin 10 persona ta drief door di wanta na e kiel di e Boto, entre nan 4 hende femenino y 6 masculino.
Un dama rescata a fayece: Helicopter a yega, y asina a hisa via cabuya algun persona for di e lama bruto aki. Algun di nan a keda warda e Metal Shark di Wardacosta. Nan tur ta procedente di Venezuela, y a bisa cu tin mas boto cu tambe a desaparece, y cu lo tin mas hende den awa.
Despues e Helicopter a bula rumbo pa Aeropuerto di Hato na Curaçao, pa asina via Ambulance transporta e prome grupo pa Hospital pa checkup.
Sinembargo despues di su yegada y mientras ta wordo atendi pa mediconan, un di e damanan cu a wordo rescata a fayece. E drama aki riba lama pues a finaliza cu un caso fatal.
Te na ciere di edicion aki no a haya ningun informacion mas pa cu e buskeda di Diaranson den dia riba lama.
