Empleadonan y STA wardando cu Thiel Corporation paga salario sino ta bay Corte

Diego de Cuba, presidente STA:

ORANJESTAD (AAN) Presidente di Sindicato Trahadornan Arubiano (STA), señor Diego de Cuba, den entrevista cu DIARIO, Diamars di e siman aki, a declara cu manera por a wak, ainda e compania Thiel Corporation no a paga su trahadornan.

   Esey ta e motibo pa cual e trahadornan hunto cu STA a bay aglomera dilanti e oficina principal di Thiel, na Emmanstraat. “El a bin pafo pa papia cu e delegadonan, pero su storianan nos ta conoce, nan no ta di awo, anto e cosnan aki ta hopi lamentable” Diego de Cuba a expresa.

   El a comenta cu nan ta hinca aworaki den un situacion unda no ta papiando so di e salario di November, pero tambe di e bonus cu e tin cu paga.

“Y nos ta den December caba, tur hende ta preocupa, pasobra si ni e salario di November e no por a percura p’e con e lo por percura pa e resto di cosnan cu e tin cu cumpli cu ne?” Diego de Cuba a subraya.

  Diamars, el a priminti cu prome cu 12’or di merdia e episodio di e salarionan di Luna di November lo wordo cera.

“Pero nos kier sa di su persona tambe, con ta para con e salario di December. Pasobra nos ta na dia 2 di December caba, y nos no kier tende dia 22 of 23 cu no tin placa pa paga December tampoco”, De Cuba a subraya, agregando cu esaki ta algo cu STA kier evita.

El a trata di tuma contacto cu Mediador, pero e ta kere cu e ta ocupa. “Pero den e contacto cu mi tabata tin cu ne, mi a pidi’e pa hala Anthony Thiel n mesa, pa sikiera atardi, despues di 4’or nos por reuni conhuntamente cu ne, pa e papia palabra cla”, Diego de Cuba a señala.

El a remarca cu un situacion asina aki, no ta sano ni pa e trahadornan, ni pa e compania, ni pa Pais Aruba.

En todo caso, e empleadonan y STA a keda cu si Diamars nan lo no a haya salario nan lo hiba Thiel Corporation na Corte.