ORANJESTAD (AAN): Biblioteca Nacional Aruba ta gradici comunidad pa 2800 donacion di buki na 2025.
Masha danki pa yuda biblioteca sigui stimula cultura y amor pa buki y lesamento. Gerente di biblioteca ta sinti un gran orguyo y gratitud pa e apoyo inmenso di e comunidad Arubano. Durante aña 2025, biblioteca a ricibi 2800 buki pa por circula pa henter pueblo. Cada donacion ta un regalo di sabiduria, cultura y inspiracion.
E buki nan lo yuda: (*) Amplia e coleccion cu mas conocemento, bos, experencia y perspectiva diverso. (*) Duna mas oportunidad pa mucha y adulto por lesa. (*) Fortalece nos papel como un centro di cultura y educacion na Aruba.
Biblioteca ta gradici tur hende y organizacion cu a contribui na e coleccion. Cu boso generosidad, biblioteca por sigui inspira pasion pa conocemento y crea un futuro mas fuerte pa henter comunidad. Masha danki Aruba!
Biblioteca ta ofrece miembrecia gratis pa baby, mucha y hoben bou 18 aña. Esaki ta habri un mundo di buki, storia y informacion den diferente idioma, entre nan Ebooks y audiobooks. Miles di buki ta warda nan!
Biblioteca ta ofrece espacio pa studia, siña, topa y reuni, computers cu Internet y tambe Free Wi-Fi. Ademas tin espacio pa diferente evento y exposicion.
