Empleadonan publico no por sigui entrega 12.6% sin haya un resumen di Gobierno

Despues di 20 luna di recorte --- ORANJESTAD (AAN):  Durante un conferencia di prensa na sede di SIMAR, lider di sindicatonan a expresa nan rechazo relaciona cu loke Prome Minister Evelyn Wever-Croes a trece dilanti den su conferencia di prensa riba dialuna.

Señora Josephine Albertus, Presidente di SIMAR a indica cu e grupo di lidernan di sindicato cu a presenta na e conferencia di prensa ta representa e grupo di sindicato cu a firma e carta di inicio pidiendo un reunion cerca Gobierno. Ora nan a tuma nota di e rueda di prensa di Prome Minister, cu a duna informacionnan relaciona cu e recorte di 12.6%, nan a keda babuca. Nan ta lamenta pa wak con Gobierno ta mal informa Pueblo riba con tur cos a bay.

Señora Albertus a informa riba ordo cronologico loke a tuma lugar entre sindicatonan y Gobierno. El a cuminsa na bisa cu tur hende por corda cu riba 13 di maart 2020, Aruba a registra e prome caso di covid. Despues di esey a bin cu diferente reto. Riba 17 di april, un grupo di sindicato a haya un yamada di Gobierno pa un reunion, na unda a papia riba e recorte di 12.6%. 

E siguiente reunion tabata riba 20 di april, na unda sindicatonan a informa Gobierno riba e sentimento entre nan miembronan. Dia 22 di april, Gobierno a saca un carta cu nan a expresa cu nan ta contento cu por a sinta y bin cu un solucion. Segun Albertus, Gobierno ta bisa cu ta Hulanda a bin cu e recorte di 12.6% y no Gobierno. Pero nan a tuma nota di diferente rueda di prensa na Hulanda, hopi a indica cu Aruba ta esun cu a propone e recorte di 12.6%.

Dia 1 di november den Corte na Sint Maarten a bin un decision, cu a indica cu ta Gobierno di Aruba a bin cu e recorte di 12.5% y Hulanda a acepta y a implementa pa tur tres isla. Gobierno ta alega cu sindicatonan ta gaña y asina kibra e credibilidad di sindicatonan. Gobierno tambe kier tira culpa riba sindicatonan riba e palabranan "tot nader orde". Sindicatonan ta refluta esaki y ta señala cu no ta nan a saca carta 20 di mei 2020, sino Gobierno, cu a indica cu den Ministerraad di 17 di april 2020 a wordo dicidi cu lo bin cu un recorte di 12.6%  tot nader orde. Gobierno no por bisa cu tur cos a bay conhuntamente cu sindicatonan, esaki ta mal informa Pueblo.

Den tur carta y reunion, sindicatonan a bisa cu semper nan ta dispuesto pa yuda y ta solidario, mirando e situacion  financiero critico di Aruba, pero loke nan no ta di acuerdo ta e manera con Gobierno ta impone riba nan, ta tratando e sindicatonan y ta faltando respet na trahadornan.

Segun Albertus, nan a manda varios carta na Gobierno pidiendo transparencia y Gobierno mes a indica cu despues di 6 luna lo saca un resumen di loke a wordo aporta door di sector publico y semi publico. Durante un reunion di dos siman pasa, Gobierno a indica cu sindicatonan mester bay Google, pasobra nan a publico tur cos. Cu e conseho aki, sindicatonan a bay check y nan no a haya ningun informacion riba e suma di placa cu e 12.6% a genera. Y esaki ta loke nan kier sa. E 12.6% cu sector publico a entrega 20 luna caba y ainda no por haya un resumen for di Gobierno.  

Como sindicatonan cu ta representa e trahador humilde, cu tin 20 luna ta entrega un parti di nan salario, ta pidi claridad riba cifranan. FASE y subsidio di salario no ta bay ta na vigor mas. Pakico nan mester sigui entrega si e 12.6% cu tabata pa yuda FASE si esaki ta bay stop. Comparando cifranan di FASE di aña pasa y di e aña aki, esaki a conoce un caida, pero empleadonan publico ainda mester sigui entrega e 12.6%. Segun CAft y Gobierno mes, Aruba lo conoce un crecemento economico y cifranan positivo. Kiermen con por hustifica cu nan mester sigui entrega e 12.6%.

Sindicatonan a tuma nota cu aña pasa na november, Minister di Finansas Xiomara Maduro, a saca un rapport riba rednan social, na unda el a mustra cu ta un grupo di companianan so a entrega y aporta na FASE.  Eric Henriquez, Presidente di SIWA a manda un carta na Gobierno pasobra si ta papia di solidaridad, e ora ta tur hende mester aporta den e crisis. Si ta un grupo chikito so ta aporta, e ora nan mester stop di entrega. Gobierno a menaza cu lo bin cu un ley, cu tur mester aporta. Pero segun rapportnan di Gobierno, den kwartaal 1, apenas 7 compania a aporta. Kwartaal 2 ta 11 di 12 compania a aporta y kwartaal 3 tabata 12 compania. Segun sindicatonan, esaki kiermen cu Gobierno sa cuanto y cua compania ta aporta.

Sindicatonan semper lo para pa derecho di e trahadornan y nan kier a trece dilanti informacionnan pa asina ora nan haci e yamada na Pueblo, y no ta manipula cu informacion y cifranan incorecto.