Den tur comunidad mester tin un hospice pa duna esnan den e 'sunset' di nan bida un mihor calidad di bida  

Hospice Atardi celebrando awe nan di 3 aniversario

ORANJESTAD (AAN):  Net awe 17 di November, ta cumpli 3 aña cu Hospice Atardi a habri su portanan.

Den cuadro di esaki, DIARIO a combersa cu Benita  Britt-Croes, presidente di Fundacion Hospice Atardi riba cual ta e necesidadnan cu nan a constata den e comunidad pa loke ta cuido paliativo.                           

El a splica cu e grupo cu a dicidi pa bin cu un hospice tabata consisti na prome instante di docternan di cas, specialista di hende grandi, boticario, kende tur a mira e necesidad di un hospice basa riba loke nan tabata observa den nan trabao y den comunidad.

Semper tin hende y nan famia cu ta pasa e ultimo parti di nan bida na cas pero cu hopi dificultad. No ta tur ora tin e condicionnan na cas, of hende pa cuida e enfermo, of tin biaha e peso emocional ta asina grandi cu e famia no por mas. Tambe tin hende den hospital cu no ta haya tratamento pa cura mas pero no por bay cas paso na cas no tin posibilidad pa duna e cuido cu mester. Pues nan ta kere cu den tur comunidad tin lugar pa tin un hospice pa yuda esnan cu mester un caminda pa ta trankil hunto cu nan famia pa biba e bida cu tin prome cu nan bay, Britt-Croes a señala. 

Cua ta e retonan di mas grandi den e tres añanan aki?                                                   

Un reto sigur tabata y ta e posicion di un hospice den un comunidad cu no ta custumbra cu esaki ainda. Comunidad ta custumbra cu cuido na cas pa hende cu cancer den fase terminal, cu ayudo di KWF y EHS.

            Awor tin hospice tambe, y pa bay eynan e persona y su famia mester a acepta cu ta bay tin un fin na e bida di e persona den un temporada di un par di luna maximal.

Pues e persona y famia mester acepta morto di un persona. Mester acepta cu ta okay si e persona no por keda cas. Paso si por keda cas y e persona y famia kier esey ta keda claro.

Loke un hospice ta ofrece ta un trankilidad pa e persona pero tambe pa su famia, e persona ta wordo cuida cu cariño na un manera profesional, y e famia ta haya oportunidad pa ta famia, nan no ta laga nan ser keri un banda, al contrario, tin un team cu ta comparti e cuido cu nan y yuda carga e peso, e presidente di e fundacion a indica.  

Un otro reto grandi tabata e pandemia cu a test nan forsa, den sentido di con pa organiza den un temporada asina vulnerable, bin cu protocol, adheri nan mes na protocol di DVG, mira pa esaki wordo implementa, a remarca. 

Con hospice a experiencia e pandemia di Covid y cua tabata boso strategia durante e aña cu a pasa?                                                                                                                  

Segun Benita Britt-Croes, na prome instante mescos cu tur otro caminda tabata tin hopi inseguridad, no tabata sigur kico lo bay pasa y kico esey lo nifica pa hospice.  Pero a bin un bon cooperacion cu DVG y ouderenzorg, "nos mester a tene nos mes na nan regla  pero a haya permiso pa sigui admiti 2 persona.                                                                                                             Nos team di profesional y boluntario a coopera hopi bon, teniendo nan mes na regla y protocol. Un parti di nos boluntarionan mester a stop pa motibo cu nan mes of nan hendenan na cas ta vulnerable, pero tin un grupo a keda bin".

Pa e famia tabata dificil tin biaha, cu limitacion di cantidad di bishita. Ta rekeri un test negativo di Covid prome cu un huesped drenta of un episodio di Covid recupera, pasobra nan no tin e structura pa cuida huesped cu ta infecta cu Covid. 

Con un famia of persona por yuda nan ser keri cu ta den e ‘sunset’ di nan bida?

Comunicacion ta e parti mas importante. Pa di prome entre e dokter y e persona y su famia si mester, e informacion mester wordo treci na un manera duidelijk y cu empatia. 

No mester sconde informacion ni obliga pa tuma informacion. Un persona tin derecho di haya sa loke e kier sa. Pa e famia ta importante pa scucha, pa puntra, no asumi nada. Tene combersacion honesto y abierto. Pasobra aunke e persona lo bay fayece, tin bida prome cu e bay. Con e kier biba su bida? Tene cuenta cu esey y unda cu por cumpli cu deseo di por ehempel topa un familiar, celebra un evento, bisa otro loke bo kier bisa. Aunke ta zona straño, e periodo aki por ta hopi bunita den cierto sentido. No ta sufrimento so, tin BIDA ainda, por hari cu otro ainda, Britt-Croes a expresa.