Director di ATIA, Herrick Henriquez: --- *No ta premira scarcedad di producto
ORANJESTAD (AAN): E tema di problema den e cadena di suministro y posibilidad di scarcedad di producto na Aruba ta keda un preocupacion pa pueblo.
DIARIO a tene un entrevista cu Director di Aruba Trade & Industry Association (ATIA), Herrick Henriquez y el a duna un actualisacion relaciona cu e situacion aki pa loke ta comercio na Aruba.
El a laga sa cu e crisis aki riba e problematica di containernan a afecta Aruba sigur door cu Aruba ta importa tur cos. Esey kiermen cu e prijsnan ta subiendo door di e prijs di container cu ta subi.
Tambe esaki a afecta e logistica cu ta e parti cu e containernan ta yegando mas laat. Pa e motibo aki e companianan na Aruba tin cu premira y planea mas adelanta pa e productonan bin Aruba y pa tin stock di tur cos, Henriquez a remarca.
El a sigui bisa cu relaciona cu un posibel scarcedad di producto, no tur ora tin tur producto disponibel mesora, pero esey tin di haber cu e logistica cu e productonan no ta yega Aruba na ora of no tin basta stock di e productonan.
Semper tin mas cu un marca di e productonan cu e consumidor por cumpra. Semper tin un marca cu por substitui otro na dado momento, a bisa.
Ta bay keda un efecto un tempo door cu mundialmente esaki ta pasando y door cu Aruba ta hopi chikito, esunnan cu ta grandi kisas ta haya mas posibilidadnan cu esunnan chikito. Toch ta wak cu e companianan ta trahando hopi duro pa e stock keda na Aruba y pa tin producto na Aruba.
Segun e director di ATIA, e no ta premira cu esey ta bay ta un "issue" cu Aruba no ta bay tin stock di productonan. "Mi ta kere cu no mester bay worry cu esey. E parti ey ta bon regla caba cu e companianan ta bezig cu ne pa percura cu no lo tin scarcedad di producto".
