Embeyecemento di Rodgers Beach ta un realidad

A.T.A.: Ban cuid’e

ORANJESTAD (AAN): Recientemente e compania di construccion Van Kessel Havenbouw a entrega e proyecto di embeyecemento di Rodgers Beach. Ta bon pa menciona cu henter e proyecto, cu a encera renobacion di e area y e parkeerplaats na Rodgers Beach, a start cu un acuerdo firma na aña 2023 y cu trabounan di construccion cu a cuminsa na januari 2024 y entrega na final di luna di mei di aña 2025. Tur esaki conforme e plan maestro dirigi riba ‘Seroe Colorado’.

            Mientras cu Van Kessel Havenbouw a ehecuta e proyecto, e trabou di supervision y coordinacion tabata den man di E comision di infrastructura cu tabata dirigi pa Ministerio di Turismo, consistiendo di DOW, DIP, DNM, TPEF y A.T.A.. Na tur e proyecto a costa riba Afl. 1.000.000,=.

            E proyecto di embeyecemento a encera cu a tira un laag nobo di asfalt riba e caminda y e area pa parkeer. E construi un caminda di asfalt nobo y un parkeerplaats nobo. A construi un stupi pa hende por cana for di e parkeerplaats pa e area di beach. A drecha e paisahe di henter e area, cu ta masha bishita pa tanto nos localnan, como tambe turistanan.

            Meta di e proyecto aki tabata pa mehora e area di Rodgers Beach pa medio di miho organisacion di e facilidadnan di parkeer y mi accesibilidad. E mehoracion aki tin como meta pa proteha nos medio ambiente di beach y crea espacio adicional pa esnan cu ta bay lama, contribuyendo na tanto sostenibilidad ambiental como tambe e experiencia completo di e usuarionan.

            Pero ainda falta, tin un plan di tempo largo pa e area. Intencion lo ta pa inclui den futuro cercano reemplaso di e gazebonan existente cu cinco palapa nobo. Drecha e pier situa dilanti di e gazebo di beton existente, inclui reinstalacion di e plataforma di buseo. Tambe basha e gazebo di beton existente abou y construi un nobo riba e mesun tereno. Pa otro aña ta intencion tambe pa construi baño publico pa henter e area.

            Inversionnan den e area aki di parti di A.T.A. ta guia pa cinco principio: compromiso cu comunidad, desaroyo sostenibel di costa, capacidad di carga, practicanan regenerativo y defensa continuo. Proyectonan relaciona cu e topiconan aki ta representa mas o menos 18% di e gastonan total di mercadeo riba e presupuesto anual di ATA. Nan tin un lista largo di proyectonan cu ta maneha anualmente, pa asina cuida nos rikesanan natural, areanan turistico y pa mehora e calidad di bida di nos propio ciudadanonan.

            A.T.A. ta agradecido di por a forma parti di esaki y ta haci un apelacion pa cuida e sitio, disfruta di dje pero sea un usuario responsabel!