Hopi pais ya ta prohibi Drones bula riba multitud di hende
ORANJESTAD (AAN): E ta algo cu ta na vigor pa hopi tempo caba na otro paisnan, incluyendo Merca. Bo no mag di bula cu Drone durante cualkier Parada di Celebracion den Caya, tampoco den Conciertonan di aire liber, den Festivalnan di aire liber, ni den Parkenan Nacional (pa proteha animalnan) y reduci polucion di sonido, y tampoco durante Parada di Carnaval.
Pasobra ta hopi hende a keda herida na e otro paisnan aki, ora cu aparatonan aki ta daña y ta bin abao y cay riba hendenan inocente y laga nan herida.
E siman aki, Autoridad di Aviacion Civil na Curaçao a haci anuncio na tur esnan cu ta bula cu Drones, pa no bay bula cu e aparatonan aki den area di Stadion Ergilio Hato na Brievengat, durante actividad di weganan di futbol eliminatorio pa Mundial di FIFA, pa e dianan cu a pasa, y tambe weganan di dia 9 y 10 di Juni venidero.
E prohibicion di usa Drones na Stadion di SDK aki ta valido for di 12’or di merdia, te cu 12’or di mey anochi.
Nan a splica cu e motibo pa e medida aki ta pa garantiza seguridad di tur persona cu lo bishita e weganan aki, y tambe e atletanan di weganan di Futbol, entre seleccionnan nacional di Curaçao y St. Lucia.
Ta anticipa cu tin un cantidad grandi di persona ta bishita e actividadnan y tin peligro cu si pa un of otro motibo e Drone haya dificultad tecnico, y cay den Stadion, esaki por ocasiona daño seriamente na hende y material.
Tur esaki ta pa garantiza seguridad durante e gran weganan eliminatorio pa Mundial di FIFA.
