ORANJESTAD (AAN) – Diadomingo awo, dia 8 di juni, señor Richard Maxwell a cuminza su carera den cuido/psychatrische verpleging na Sint Jozef Stichting Apeldoorn, Hulanda.
El a cuminza su carera na cama di e pashent y despues di 60 aña ta termina su carera tambe na cama di pashentnan cu problema mental y cu paliativo, esta, pashentnan cu ta prefera fayece den nan ambiente confidencial, esta, na cas.
Señor Maxwell, na 1971, a obtene su Diploma di Enfermero General, na Johannes de Deo na Haarlem y na 1976 su Diploma di Docente den Enfermeria na Sociale Akademie Twente, Hengelo.
Durante e 60 añanan cu a transcuri, señor Maxwell a labora na San Pedro Hospital como enfermero y durante 1979-1992 como Hoofd Opleidingen na Dr. Horacio Oduber Hospital. Durante 1993-1997, como Director na San Francisco Hospital, Bonaire. Tambe el a labora como Leraar Algemene Verzorging na EPB y Verpleegkundige na Visser Trading (Boticanan). Durante 2013-2025, señor Maxwell a traha cu Meander Groep y actualmente vrijwilligerswerk pa Stitching Radar.
Señor Maxwell tambe tabata conoci pa su Buro Maxwell y a duna diferente training na personanan/profesionalnan y organizacionnan importante manera: KPA, Douane, C.E.A, SIAD, Postkantoor, Visser Trading y mas.
Tambe, señor Maxwell, na 1989 a funda e Organizacion di Enfermeronan di Aruba (O.D.E.A) y e tabata presidente varios aña. Ademas, na 2008, na Guadeloupe, el a wordo elegi como presidente di The Caribbean Nurses Organization CNO.
Na 2006, señor Maxwell a wordo condecora como Ridder in de Orde van Oranje Nassau.
