ELMAR ta optimalisa proceso di inspeccion solar pa sirbi e clientela cu mas eficiencia

ORANJESTAD (AAN):   Audrey Croes, PR & Communication Officer di N.V. ELMAR a trece dilanti cu na juli 2023

, ELMAR a separa e team di planning cu tabata encarga cu e parti di inspeccion tambe y for di e momento ey tin un team dedica na inspeccion so.

            El a splica cu nan a atende cu retrasonan cu tabata existi pa cu inspeccion. Awo e ta bayendo miho, pero nan a haya cierto desafionan pero cu nan ta resolve.

            Croes a sigui bisa cu por ehempel, e dia cu e tin ta haci inspeccion solar ta riba diabierna. Locual ta e parti administrativo y tecnico ta tur dia den siman. Pero inspeccion 'on-site' mes ta riba diabierna. Den cuminsamento di aña tabata tin varios dia festivo cu a cay riba diabierna y esey automaticamente ta afecta e operacion.

            Loke ELMAR ta haci ta aloca dianan acerca pa por atende cu tur e cambionan di manera cu e operacion cu inspeccion ta bay miho, pero toch ta topa cu desafionan durante aña, el a remarca.

            Tur dia tin inspeccion, Audrey Croes a enfatisa. Inspeccion pa loke ta panelnan solar esey ta bay riba diabierna. Logicamente tin un proceso cu mester cana ora di instala un panel solar. ELMAR ta boga pa e pre-inspeccion.

            El a remarca cu prome cu inverti den un panel solar ta recomendabel pa pidi ELMAR un pre-inspeccion pa asina sa si por conecta e parcela cu e grid di coriente. Asina cu tin esey e proceso ta cana mas facil.

            Ta importante pa e cliente sa cu pa e haya un aprobacion pa 'solar energy' pa tur ampliacion di su cas mester 'gekeur'. Tin clientenan cu no tabata na altura di e informacion aki na momento cu nan a inverti. Esey kiermen cu nan mester bay cana un trayecto mas largo pa por haya e inspeccion acerca y despues esun solar, e vocero di N.V. ELMAR a indica.

            E compania ta boga pa e aprobacion preliminar y pa sa si e cas ta adecua pa haya 'solar energy', pero tambe pa e cliente drenta e portal di ELMAR cu yama 'CE-Portal' pa sa e caminda cu e cliente tin cu cana. Tambe por pidi un instalateur reconoci pa e nummer di e peticion y abo mes ta wak con e proceso ta cana, Croes a señala.