Kiwanis Club of Palm Beach cu reconocemento na varios organisacion y fundacion

ORANJESTAD (AAN):  Diasabra dia 26 di April 2025 Kiwanis Club of Palm Beach a tene un ceremonia pa duna reconocemento na varios organisacion caritativo of social den nos communidad.

E reconocemento aki ta parti di e donacion cu a wordo otorga caba cu wordo cubri cu fondo procedente di Kiwanis Club of Palm Beach su actividadnan di recaudamento di fondo, entre otro esnan cu recientemente a wordo organiza durante temporada di Carnaval: e conocido Kiwanis Masquerade Party y e Kiwanis Carnival Fundraising Tent na Boulevard.

            Na e ocasion aki, Presidente di Kiwanis Palm Beach 2024-2025, Sr. Ross Brezovar a expresa cu Kiwanis Club of Palm Beach tin e bienestar di nos communidad central den tur su actividadnan y cu e Club ta enfoca especialmente riba muchanan den nescesidad.

            Sr. Roël Gomez, maestro di ceremonia, a presenta e lista di benificarionan pa e anochi menciona: “Fundacion Ban Duna Man Pa Cria Nos Muchanan, Stichting Neptali Henriquez Park, Biblioteca Nacional Aruba, Stichting Wit Gele Kruis, Edmund Harms Foundation, Stichting YMCA Aruba, Fundacion pa Nos Muchannan, Builders Club - Colegio San Antonio, SV Dakota, SV Caiquetio, Racing Club of Aruba, Pariba Boxing Club, Mickey’s Foundation, University of Aruba – Aruba Doet 2025, Kidneys297, Circle K - University of Aruba y Terrific Kids Program na St. Dominicus College, St. Franciscus y Colegio San Hose.”

            Kiwanis Club of Palm Beach kier tuma e oportunidad aki pa extende palabranan di gratitud na tur esnan cu a haci compra di cuminda of bedida na nos Carnaval Fundraising Tent, y tur esnan cu a cumpra tickets pa e Masquerade Party, y di e forma aki a contribui na e fondonan recauda. Ademas un inmenso gradicimento ta bay na e comerciantenan cu semper ta aporta na e proyectonan menciona. Danki na e sosten aki a logra di otorga e donacionnan menciona na organisacionnan y fundacionnan cu enfoque riba bienestar di muchanan den nos comunidad.

            Kiwanis Club of Palm Beach ta pertenece na e organizacion global Kiwanis International cu ta un instancia caritativo dedica na haci nos mundo mihor door di cambia un comunidad pa medio di un mucha cada bes.