Hotel y Restaurant ta principal fuente di trabao na Aruba segun Encuesta Laboral 2023

Rol creciente di hende muhe den varios sector:

*Hende homber ta mayoria na nivel di maneho, hende muher na nivel di profesion 

ORANJESTAD (AAN): En conexion cu celebracion di Dia di Obrero dia 1 di mei 2025, Oficina di Estadistica (CBS) a presenta datonan hopi interesante tocante e forsa laboral di Aruba.

            Segun e Encuesta di Forsa Laboral 2023, Aruba tin un total di 54,523 hende emplea, cu un distribucion casi igual entre hende masculino (49.9%) y hende femenino (50.1%). Mayoria di e hende emplea ta den e grupo di edad di 15 pa 54 aña (73.4%), sigui pa e grupo di 55-64 aña (22.1%).

            E sector di industria mas popular tanto pa hende masculino como femenino ta “Hotel y restaurant”, cu 20.1% di e hende hombernan y 24.7% di e hende muhenan.

            Pa hende homber, e otro sector importante ta “Wholesale y retail trade” (14.9%) y “Construccion” (13.2%), mientras cu pa hende muhe ta “Wholesale y retail trade” (15.6%) y “Cuido y trabou social” (9.9%).

            Den e industria di hotel y restaurant, hende muhe ta predomina cu 55.2% compara cu 44.8% hende homber. Esaki ta refleha tambe den distribucion pa edad den e sector, caminda hende muhe ta representa un porcentahe mas halto den tur grupo di edad.

            Tocante ocupacion, e top 3 pa homber ta:

- Trabou di ofishi (craft related trades) 15.0%

- Ocupacionnan elemental (17.1%)

- Trabou di servicio y benta (21.7%)

            Pa hende muhe, e top 3 ta:

- Trabou administrativo y di apoyo (17.0%)

- Ocupacionnan elemental (18.8%)

- Trabou di servicio y benta (30.8%)

            Na nivel di maneho, 57.4% ta hende homber y 42.6% ta hende muhe. Interesantemente, e situacion ta inverso den loke ta profesionalnan, caminda 60.9% ta hende muhe y solamente 39.1% ta hende homber. Esakinan ta inclui profesionnan den enseñanza, salud, negoshi, y otro campo profesional.

            E datonan aki ta duna un bista claro riba e dinamica di empleo na Aruba y e rol creciente di hende muhe den varios sector. 

Fuente: Encuesta Forsa Laboral 2023 – CBS Aruba