Elmar ta invita profesional y studiantenan na Hulanda pa topa nan na FRED Job Fair & Conference 2026

ORANJESTAD (AAN): E compania NV Elmar ta invita profesional y studiantenan cu ta biba of studia na Hulanda pa topa cu nan team durante FRED Job Fair & Conference 2026,

cu lo tuma lugar diasabra 24 di oktober 2026 na WTC Rotterdam, cuminsando pa 11:00 am.

   Despues di su participacion na FRED na 2025, ELMAR ta bolbe e aña aki pa sigui conecta cu talento interesa den oportunidadnan profesional na Aruba. Durante e evento, bishitantenan por pasa na booth #25 pa conoce mas tocante ELMAR, nan cultura di trabou, e rol cu nan compania tin den desaroyo di Aruba y e oportunidadnan profesional cu por presenta den diferente area di nan organisacion.

   Actualmente ELMAR tin y ta anticipa diferente oportunidad profesional pa 2026 y 2027, entre otro den area di engineering, information technology, safety & security, finance y project management. Algun di e posicionnan ta inclui Information Security Engineer, Maintenance Specialist, Safety & Security Officer, Data Engineer, Electrical Engineer y Project Manager - Team Planning & Projects.

   Cu sector di energia den constante desaroyo, ELMAR ta busca pa conecta cu profesionalnan cu ta interesa den un futuro profesional na Aruba y cu kier contribui na desaroyo di energia, economia y nos isla.

   Como parti di e programa di FRED 2026, ELMAR tambe lo participa den e panel discussion “Keeping the Islands Running: Aviation, Energy & Tourism as Economic Engines”, bou di e tema: What keeps the Dutch Caribbean moving forward? Durante e panel, Melissa Ritfeld di NV Elmar lo participa hunto cu Dutch Caribbean Air Navigation Service Provider, Aruba Airport Authority N.V. y Curaçao Marriott Beach Resort y The Pyrmont Curaçao Beach Resort.

   E conversacion lo enfoca riba e rol fundamental cu aviacion, energia y turismo tin como motornan economico di Caribe Hulandes, y con e sectoranan aki ta contribui na continuidad, crecimiento y desaroyo futuro di nos region. E panel discussion ta programa pa 1:00 PM te 1:20 PM na WTC Rotterdam.

   ELMAR ta anima tur profesional y studiante na Hulanda cu tin interes den oportunidadnan profesional, energia, tecnologia, servicio y desaroyo di Aruba pa pasa na booth #25, papia cu nan team y descubri mas tocante e posibilidadnan cu ELMAR tin pa ofrece.

   Pues awe Diasabra na Rotterdam, for di 11;00 am den WTC Rotterdam, y Elmar lo ta na ‘booth 25’.  E panel discussion di Elmar ta di 1:00 pm te cu 1:20 pm.

   Pa mas informacion tocante N.V. ELMAR, bishita www.elmar.aw.  Pa mas informacion tocante FRED Job Fair & Conference, bishita www.fredexpo.com.

    ELMAR ta spera di topa cu nos profesionalnan y studiantenan na Rotterdam. E energia cu ta uni nos.