Segun Miriam Dabian AF&BA:
ORANJESTAD (AAN): E escasez di personal ta un reto cu ta afecta diferente industria na Aruba, y no solamente e sector di horeca. Asina señora Miriam Dabian di Aruba Food & Beverage Association (AF&BA) a declara den un entrevista cu DIARIO. Segun Dabian, e necesidad continuo pa trahadornan ta refleha, entre otro, den e cantidad di job fairnan cu ta wordo organiza.
Dabian a expresa su preocupacion cu e situacion por bira ainda mas serio si no tuma medida na tempo. E falta di personal ta aumenta e presion riba e trahadornan actual, cu por haya nan mes den un situacion caminda nan no por tuma suficiente descanso, vakantie of dianan liber durante dianan di fiesta, pasobra no tin otro personal pa cubri nan trabao.
A pesar di e posibilidadnan nobo cu a wordo habri, Dabian a indica cu ainda tin necesidad di un solucion concreto. Den e sentido aki, el a señala cu Gobierno mester tuma decision pa no habri mas necesidad di trabao y evita cu e demanda pa personal sigui aumenta sin cu tin suficiente trahadornan disponibel.
Dabian a subraya cu Aruba mester ta prepara pa atende e bishitantenan cu ta yega cu e proximo buelonan nos dilanti. E preparacion aki ta esencial pa garantisa cu producto Aruba, como destino, por sigui brinda un servicio di calidad tanto na turistanan como na e comunidad local.
Sinembargo, el a enfatisa cu mester evalua e capacidad di e mercado laboral prome cu sigui stimula mas crecemento den turismo. Segun Dabian, si e cantidad di bishitante sigui aumenta sin suficiente personal pa atende nan, esaki por afecta e calidad di servicio y aumenta e carga riba e trahadornan.
Pa conclui, Dabian a reafirma cu AF&BA ta dispuesto pa colabora den e buskeda di un solucion. El a enfatisa cu atende e escases di personal ta esencial pa proteha e bienestar di trahadornan y mantene e calidad di servicio cu tanto turistanan como e comunidad local ta merece.
