Invitacion di Gino Frans pa AWE nochi:
ORANJESTAD (AAN): Gino Frans di Eliezer Rehab Farm ta expresa su preocupacion profundo pa e problematica di adiccion na Aruba, particularmente entre hubentud. Durante un entrevista cu DIARIO, el a describi e situacion como serio y doloroso, y a enfatisa e necesidad di sigui ofrece yudansa y perspectiva na personanan cu ta enfrenta dependencia di droga y alcohol.
Frans, kende mes a lucha cu adiccion durante su hubentud, a conta cu e y Elvis Peasch, miho conoci como “Bebe Lechi”, tabata “bati caya” durante nan añanan di scol. Despues cu Peasch a entrega su bida na Cristo y a sali for di adiccion, un encuentro entre nan a marca un cambio den bida di Frans, kende tambe a comberti na un edad hoben.
Pa Frans, nan experencianan ta un testimonio di e transformacion cu fe por trece. El a expresa su conviccion cu, mescos cu Dios a cambia su bida y esun di Peasch, tin speranza pa otro personanan cu ta lucha cu adiccion.
Segun su observacionnan, muchanan ta cuminsa experimenta cu droga na un edad cada bes mas abou. El a splica cu, aunke inicialmente nan ainda tin un cas pa regresa, e dependencia por avansa y trece consecuencianan serio, incluyendo e riesgo di termina sin un hogar y termina riba caya.
Frans a expresa preocupacion tambe pa loke el ta describi como e mayor potencia y disponibilidad di droga na Aruba. Segun su experiencia, e mezcla di sustancianan ta contribui na un deterioro rapido di e persona su bienestar.
Den cuanto e trabao di Eliezer Rehab Farm, Frans a informa cu e organizacion tin plannan pa amplia su esfuersonan. Sin embargo, e posibilidad di establece un centro na un lugar cu nan a identifica no a ricibi aprobacion pa motibonan relaciona cu e bario. Esaki a retrasa e plannan, pero e ta mantene fe cu nan lo por sigui avansa.
Como parti di su esfuerso pa acerca comunidad y ofrece speranza, Frans ta invita pueblo di Aruba, particularmente personanan cu ta enfrenta adiccion y nan famianan, na dos anochi di concierto dedica na fe, speranza y union spiritual.
E conciertonan lo tuma lugar dia 30 y 31 di october, cuminsando 7:00 di anochi, riba e tereno di parkeer di ex Texas Furniture Store, banda di The Music Box. Durante e anochinan, pastor y evangelista Elvis Peasch lo comparti su testimonio di con el a sali for di adiccion a traves di su fe y a dedica su bida na sirbi y yuda otronan. Entrada pa ambos anochi ta completamente gratis.
