Elmar instalando na Sabana Blanco un switch nobo cu ta isola door di gas

ORANJESTAD (AAN): Na e proyecto di e construccion nobo di un Substation di 60KV na Sabana Blanco, tin equipo inovador ta wordo instala tambe.

   Den e futuro substation aki ta instalando un switch gear nobo cu ta opera na 60mil volt, y ta conoci como GIS, gas insulated switchgear. E compania cu ta facilitando e instalacion di e switch gear aki ta Hitachi di Japon.

   E switch gear ta un parti importante den e proceso di transmision di coriente electrico pa por distribui’e den tur bario di Aruba. E instalacion di e switch gear aki ta forma parti di e transicion unda pronto esaki lo reemplaza e substation actual. E cambio aki lo sigura cu NV Elmar por sigui cumpli cu e demanda creciente di coriente electrico den e area aki. E substation aki ta e ader mayor di aeropuerto, hospital, y e area turistico.

   Pa logra e proyecto aki, ta conta cu colaboracion di diferente departamento manera Innovation & Engineering, Planning & Projects, Grid Quality Management y Underground Services. Tur e departamentonan aki ta traha hunto pa asina por duna e servicio mas optimo y sigura un suministro di coriente electrico confiable y di calidad.