Varios cruzada tin necesidad urgente di ricibi borchi di preferencia

Asociacion di Scolnan di Rijbewijs ta indica

ORANJESTAD (AAN): Dirigentenan di Asociacion di Scolnan pa Rijbewijs (VRA) na Aruba ta preocupa cu falta di borchi na diferente cruzada riba e isla aki, y e ta pone cu seguridad den trafico ta bin na peligro.

   Sigur un campaña masal tin di bay tuma lugar, unda ta earmark placa pa asina laga DOW keda encarga pa pone borchi na varios cruzada cu ta peligroso aworaki.  Claro cu Ministro tin di firma un Decreto Ministerial pa asina declara cual trafico riba e cruzada tin preferencia, pa asina por pone borchi.

   Secretario di Asociacion VRA, esta Thomas Ruiz a duna e ehemplo claro di loke ta pasando aworaki na e cruzada cu tin banda di edificio di WEMA Hardware na Ponton.  Aki tin e caminda principal di Tanki Flip pa Ponto, y tin un cruzada ta bay pabao direccion Hato, y un cruzada ta bay pariba direccion Tanki Leendert.

   Ruiz a splica cu e Asociacion VRA ta haya hopi yamada y comentario riba cierto cruzada na Aruba unda e situacion di trafico ta peligroso.

   Reclamonan di mas grandi aworaki ta di e cruzada cu tin banda di WEMA Ponton, y tambe e ‘cruzada-T’ cu tin un tiki mas pazuid banda di ex-iStore Aruba cu ta bay pabao rumbo pa Hato.

   Ora cu bo a caba di sali di rotonde di Tanki Flip bayendo zuid pa Ponton, bo ta topa cu e Borchi B-1 cu ta indica cu bo ta riba un Caminda di Preferencia.  E borchi B-1 aki ta keda valido te ora bo yega un cruzada of borchi cu ta indica otro.   Ora bo yega na e cruzada banda di WEMA, bo no ta haya borchi!  Na opinion di Ruiz, esey nifica cu esaki ta djis un cruzada igual.  Pues aki e regla na cruzada di WEMA Ponton ta cu trafico di man drechi tin preferencia.  Pues e borchi di B-1 a wordo lubida.

   Reclamonan ricibi ta cu mainta y tambe atardi, e cruzada aki banda di WEMA Ponton ta hopi druk mes.  Un auto cu ta bin di e caminda saliendo di Tanki Leendert pa cruza e caya pa sigui bay pabao rumbo pa Hato, tin hopi dificultad pa mira trafico.  Pa colmo riba caminda di Tanki Flip pa Ponton tin un borchi di 80 km/h poni.  Siendo cu na opinion di Ruiz, kizas un velocidad di 50 km/h lo ta mas rasonable or cu ta druk.

   A haya reclamo tambe di e zebrapad cu tin poni na e cruzada ey banda di WEMA.  Ley ta indica cu un automobilista no por para riba zebrapad.  Sinembargo aki durante construccion, a pinta e zebrapad di tal manera cu ya bo ta hayabo obliga di para riba e zebrapad pa bo por wak pa trafico y asina subi caminda.

   Tin e pensamento cu kizas instalacion di un spiel na e cruzada aki lo yuda chauffeurnan saliendo for di sea Hato of Tanki Leendert por tin un mihor bista di trafico di otro banda, y calcula e velocidad.

   Ora di papia di seguridad di trafico, ta hopi caminda tin asina!  Ruiz a menciona tambe e pida caminda di Rotonde Tanki Leendert bay zuid pa e Rotonde di Watty Vos Boulevard cerca di Cas Casuela.  Riba e pida caminda aki tin dos ‘cruzada-Y’ banda pabao, y no tin borchi.  Pero ningun automobilista ta stop, pasobra hopi ta kere cu nan tin preferencia.

   Ruiz a comenta tambe riba e cruzada cu tin riba Caya Betico Croes, na altura di Bondia Supermarket.  Aki tampoco no tin borchi, pues aki ta man drechi tin preferencia.

   E speranza ta cu Polis di Trafico hunto cu DOW por cuminza traha lista di e cruzadanan aki cu mester borchi urgentemente, pa asina trece solucion pa haci trafico mas safe.