Director di Camara di Comercio, Martijn Balkestein
ORANJESTAD (AAN): Den un entrevista cu DIARIO, señor Martijn Balkestein, Director di Camara di Comercio (KvK) a splica cu tin hopi mas compania chikito lantando compara cu companianan grandi. E cantidad di inscripcion a aumenta, si ta compara cu cifranan di cantidad di ceramento di negoshinan.
Segun Balkestein tin 97 compania chikito inscribi den KvK, na Hulanda por ehempel ta considera e categoria di compania chikito y mediano, pero tambe mester papia riba 'micro business' cu ta existi di 1 pa 3 persona. E tipo di companianan aki ta hopi importante pa economia, pasobra nan ta forma e forza laboral. E dies compania grandi na Aruba ta genera mas tanto e placa, pero e otro ta duna e trabaonan.
Balkestein a bisa cu den todo caso, tin hopi compania cu ta wordo lanta y pa prome biaha den cuatro aña, nan a wak cu e cantidad di 'eenpersoonsbedrijf' a surpasa e VBA. Den ultimo añanan VBA ta e vehiculo legal cu ta wordo usa pasobra e ta hopi mas safe pa un entrepreneur pa lanta esey, pa no core riesgo cu ta perde nan cas of propiedad. KvK tin un sospecho cu door di incertidumbre relaciona cu DGA-regeling (directeur-grootaandeelhouder), companianan ta opta pa bay na 'eenpersoonsbedrijf'.
E tendencia a cambia durante pandemia di Covid-19, na unda tin un cantidad mas cu normal di hende cu a lanta un compania, esaki a baha un tiki, pero keto bay KvK tin den un base di un aña, por lo menos 800 compania inscribi.
E tendencia di aumento di companianan chikito no ta solamente na Aruba, pero rond mundo, segun Balkestein, esaki por ta debi cu hopi hende cu a traha den cierto negoshi y a dicidi di lanta nan mesun negoshi y bira nan mesun hefe. E tendencia aki ta mustra cu no ta algo temporal pasobra nan ta wak esaki desde 2020 caba.
Balkestein a bisa cu tin un demanda grandi pa trahadornan, kiermen un escasez di trahadornan riba tur nivel.
Aruba no a crece den cantidad di hende cu ta biba na aki, y tabatin un periodo cu nos isla tabata conoci como 'e pais cu crecemento mas lihe na mundo', pero den ultimo añanan e poblacion a disminui y esaki tambe ta un factor den scarcedad di trahadornan, pasobra e economia si a crece.
