ELMAR cu donacion di computers na YMCA San Nicolas contribuyendo na iniciativa digital pa Adulto Mayor

ORANJESTAD (AAN): - N.V. ELMAR a contribui cu un donacion di 10 computers na YMCA San Nicolas,

como parti di su iniciativa “Workshop Klik y Siña pa Adulto Mayor”. E donacion aki a crea un espacio accesibel den YMCA, caminda adultonan mayor por siña uzonan digital basico, manera e uzo di computer, “browse” riba internet, y keda conecta cu e comunidad via plataformanan digital.

            “Nos ta sumamente orguyoso di e colaboracion cu YMCA San Nicolas y señora Jacqueline Woodley. Pa ELMAR, e donacion aki ta mas cu un gesto, e ta un paso concreto pa sigui brinda sosten na e bario di San Nicolas, un comunidad cu ta importante pa nos.”

            Mientrastanto, cu nos sucursal den San Nicolas ta pasando den un renobacion pa mehora e experiencia di servicio na cliente, ELMAR ta brindando alternativo y apoyo adicional na clientenan cu ta depende di nos sucursal pa pago y servicio.

            ELMAR ta compremete pa sigui brinda sosten na bienestar di nos comunidad, y e iniciativa aki ta un paso den nan mision pa inclusion digital y sosten na bienestar di adultonan mayor riba nos isla Aruba. E Mundo Digital ta pa tur Edad!