ORANJESTAD (AAN): Malesa di sucu "Diabetes" ta un problema di salud cu ta den gran aumento.
Diabetes ta afecta diferente parti di nos curpa cu ta trece dificultad pa funciona den bida diario si nos no tene nos mes na e guia di dokternan di cas, enfermeranan di POH of institucion nan encarga cu e cuido di patient cu ta sufri di sucu.
Bin scucha, bin informa bo mes tocante di Diabetes y su consequencianan pa nos bista. E charla aki lo bay ta Diamars dia 10 di Juni 2025, pa 6:00 pm atardi na Centro di FAVI, na Primavera 233.
Riba iniciativa di nan Conseho di Cliente, FAVI ta organiza un charla informativo hunto cu Dr. Lacle, Specialista di wowo, y Centro Diabetico Aruba. Durante e charla aki lo worde splica kico diabetes por causa na bo bista y con bo por preveni daño.
E charla educativo aki ta habri pa tur hende cu ta interesa, pues cliente, famia, profesionalnan y comunidad di Aruba y ta completamente gratis.
For di 6:00 pm pa 7:00 pm tin oportunidad pa haci un chequeo di bista. Tambe tin mesa di informacion di FAVI y por haya informacion di Centro diabetico.
Pa 7:15 pm lo tin presentacion di Centro Diabetico Aruba tocante di diabetes. Pa 8:15pm tin presentacion di Dr. Lacle tocante efecto di diabetes ariba bo bista. Na final tin espacio pa haci preguntanan y haya conseho.
Tene cuenta cu tin un cantidad limita di asiento disponibel, pues ta obligatorio pa registra.
Yama nan na 582-5222 of 582-5051 of por manda un WhatsAapp na 560-9225 of registra via facebookpage: FAVI primavera. Laga nos sigui traha hunto pa trece mas consientisacion ariba cuido di bo wowo.
