Alumnonan di Ceque College a bay haya sa mas di Refineria di Eagle

ORANJESTAD (AAN): Recientemente e alumnonan di Klas 3 di Ceque College Mavo, a bay tene un excursion interesante pa asina e hobennan haya sa mas di historia di Aruba.

   E biaha aki, nan a bay haya sa mas di e historia di tempo cu tabatin un Refineria na Eagle na Aruba.

   Pa e motibo ey, nan prome parada tabata na Bubali, unda tin e edificio di Quinta del Carmen.  Pasobra esaki tabata e lugar cu a sirbi como Hospital e tempo aya pa Refineria di Eagle.  Na Quinta del Carmen, e alumnonan a haya un presentacion cortico di e refineria y tambe loke a socede durante Segunda Guerra Mundial.

   Tambe a bay bishita e edificio unda awor Departamento di D.R.H. ta situa, cu den pasado a fungi como e Oficina Principal di Eagle Refinery, y aki a haya sa mas di e rol cu nan ta eherce.  Bunita pa mira cu ainda tin algun ‘obheto’ di e epoca di refineria eynan.

   Posteriormente a bishita Divi All-Inclusive Hotel, cu ta e lugar cerca di unda e torpedo Aleman a ser haya di e Segunda Guera Mundial.  Riba tereno di e hotel tambe tin ainda tuberia cu a keda ta simboliza e pasado di refineria eybanda.  Studiantenan a haya un splicacion breve di esaki.  Scol ta manda palabra di danki na Monumenten Fonds Aruba pa organiza e excursion aki.