Elmar a organiza di tres edicion di ‘Chispa di Informacion’ pa agencianan di Real Estate

ORANJESTAD (AAN): E compania NV Elmar recientemente a organiza un otro edicion di Chispa di Informacion,

un sesion informativo pa comparti informacion practico cu real estate agencies tocante servicionan y procesonan di Elmar cu nan ta uza regularmente den nan trabao.

   Cada aña, NV Elmar ta organiza Chispa di Informacion pa diferente stakeholder, creando espacio pa comparti informacion, haci pregunta y intercambia experiencia. Den añanan anterior, entre otro, instaladonan reconoci y agencianan di real estate a participa den e sesionnan aki.

   E edicion aki a conta cu participacion di real estate agencies nobo, como tambe agencianan cu ainda no a participa den un sesion anterior.

   Durante e sesion, NV Elmar a trata diferente tema cu ta relevante pa  e servicio cu real estate agencies ta brinda na nan clientenan: e proceso pa aplica pa un meter di coriente y e-Connect, e plataforma digital di Elmar pa consulta factura y monitorea consumo di coriente.

   Como tema nobo pa e edicion di e aña aki, Planning & Projects Team di Elmar a splica e proceso relaciona cu infrastructura di coriente pa proyectonan grandi di desaroyo di bario y vivienda.

   E tema aki ta cada bes mas relevante, mirando cu real estate agencies tambe ta involvi den proyectonan di desaroyo, ademas di compra y benta di propiedad. Conoce e rekisitonan y diferente pasonan for di inicio di un proyecto por contribui na miho planificacion, expectativa mas cla y un coordinacion mas eficiente entre tur partido envolvi.

   Durante e presentacion, e participantenan a ricibi splicacion riba e diferente pasonan y rekisitonan, y tabatin amplio espacio pa haci pregunta directamente na representantenan di Elmar y comparti experiencia.

   Cu Chispa di Informacion, NV Elmar ta sigui fortalece e cooperacion cu stakeholdernan y haci informacion mas accesibel, pa contribui na un proceso mas cla y eficiente tanto pa real estate agencies como pa nan clientenan.