Cumbre di Real Estate na Aruba a fortalece dialogo y colaboracion y mas den e sector aki

ORANJESTAD (AAN): E cumbre yama ‘Aruba Real Estate Summit 2026’ a conclui exitosamente despues di dos dia inspira,

caracteriza pa dialogo constructivo, intercambio di conocemento y oportunidad pa fortalece colaboracion entre gobierno, sector priva y profesionalnan activo den sector inmobiliario.

   E cumbre, organiza pa ID Realty Group, a tuma luga dia 27 y 28 di augustus 2026 na Embassy Suites. E evento a reuni experto, profesional,den, representante di gobierno, formulador di maneho y otro actor importante pa papia tocante e desaroyo, responsabilidad y retonan cu ta forma presente y futuro di sector inmobiliario na Aruba.

   Meta di e cumbre tabata pa crea un espacio unda por comparti informacion, experiencia y diferente punto di bista, mientras ta promove profesionalismo, transparencia, innovacion y crecemento responsabel. E temanan presenta durante e dos dianan tabata importante no solamente pa profesionalnan den sector, sino tambe pa doño di cas, futuro cumprador, inversionista y comunidad Arubano en general.

   Presencia y participacion di representantenan di gobierno, entre nan Minister Rene Herdé y Angelo Brete di Financial Intelligence Unit, a contribui na e dialogo necesario entre sector publico y priva. Nan participacion a enfatisa importancia di colaboracion ora ta trata temanan relaciona cu infrastructura, maneho, desaroyo economico y crecemento sostenibel di nos isla.

   Durante e prome dia, e publico a haya oportunidad di tende diferente presentacion y participacion di expertonan cu a comparti nan conocemento y vision riba realidad y futuro di mercado inmobiliario. E programa a inclui tambe espacio pa panelnan y intercambio di idea tocante e responsabilidad di tur e actornan cu ta forma parti di e sector.

   Otro punto sobresaliente di e programa tabata e presentacionnan di Nigel Maduro, Inheritas y EcoAruba Smart Build. Nan contribucion a trece perspectivanan relevante tocante planificacion, innovacion, construccion inteligente y solucionnan cu por aporta na un desaroyo mas sostenibel y prepara pa futuro.

E presentacionnan aki a demostra cu desaroyo inmobiliario no ta trata solamente di construi propiedad, sino tambe di pensa riba herencia, sostenibilidad, eficiencia y e impacto cu decisionnan di awe por tin riba futuro di Aruba. Nan participacion a invita e publico pa wak sector inmobiliario for di un perspectiva mas amplio y consciente.

   Durante e di dos dia, e programa a continua cu mas presentacion, intercambio di experiencia y dialogo tocante profesionalisacion di sector. E variedad di oradornan y temanan a ofrece un vision amplio di e oportunidad- y retonan cu profesionalnan, inversionistanan y comunidad ta enfrenta actualmente.

   Joyce Bartels Daal, como orador principal final di e di dos dia, a brinda un clausura valioso na e cumbre. Su presentacion a contribui cu reflexion y inspiracion, reafirmando importancia di liderazgo, conocemento y colaboracion pa sigui eleva nivel di sector inmobiliario na Aruba.

   E cumbre a confirma cu tin un necesidad real pa plataformanan unda sector publico, sector priva y comunidad por encontra otro, comparti informacion y busca solucionnan hunto. E desaroyo di sector inmobiliario tin un impacto directo riba economia, calidad di bida y futuro di nos isla, y p’esey e combersacionnan aki ta di gran importancia pa henter comunidad.

   ID Realty Group ta expresa su gradicimento na tur orador, panelista, moderador, profesional, huesped special y participante cu a aporta na calidad y exito di e programa. Un palabra special di gratitud ta bay na tur sponsor, medio di comunicacion y colaborador cu nan confianza y sosten a haci Aruba Real Estate Summit 2026 posibel.