ELMAR a lansa 'Workshop Klik y Siña" pa Adulto Mayor

*Un Workshop pa Empodera Nos Adultonan Mayor 

ORANJESTAD (AAN):  - Den un mundo unda cu tecnologia ta evoluciona constantemente, ta esencial pa tur generacion, incluso nos adultonan mayor, keda conecta y bon informa. Pa responde na e necesidad aki, ELMAR en colaboracion cu Sra. Woodley a lansa “Workshop Klik y Siña pa Adulto Mayor” na YMCA San Nicolas, un programa enfoca riba alfabetisacion digital y integracion tecnologico pa nos hende grandi.

            E “Workshop Klik y Siña” ta empodera nos adultonan mayor cu habilidadnan digital esencial y yuda forma e confiansa necesario pa participa den e mundo moderno di awendia. E workshop ta ofrece guia riba uzo di computer hunto cu smartphone y con pa “browse” internet y haci pagonan online.

            E sesionnan ta wordo dirigi pa Sra. Jacqueline Woodley, un coach cu hopi experiencia y amor pa nos adultonan mayor. Un workshop completamente gratis cu a inicia dia 21 di mei y lo dura un total di 5 siman na Y.M.C.A. San Nicolas.

            ELMAR ta sigui pone prioridad riba nos adultonan mayor y promove un comunidad mas inclusivo pa tur hende. Pa mas informacion riba e “Workshop Klik y Siña”, por tuma contact cu ELMAR su Departamento di Customer Service na 523-7100.

E Mundo Digital ta pa tur Edad!