PARAMARIBO: E conteo di votonan ainda ta sigui na Suriname. Te cu Diaranson anochi,
nan a conta caba e 265.131 di e 270.861 votonan cu a wordo deposita. Alavez por mira cu e dos partidonan na cabez ta Partido NDP cu tin 34.11% di votonan, sigui pa Partido VHP cu tin 31.8% di e votonan.
Partido NDP ta lidera pa e dama Jennifer Simons di 71 aña di edad, y chens ta hopi grandi cu e lo bay bira e President nobo di Suriname. Partido VHP na di dos lugar, ta esun cu e actual president Santokhi ta lidera.
Pero si bo check e conteo di voto individual, por mira cu Chandrikapersad Santokhi tin ya 44.468 voto, y Jennifer Simons tin 40.043.
Por nota cu Partido ABOP di Ronnie Brunswijk, awor ta na di tres lugar y a sobrepasa Partido NPS di Ashwin Adhin.
Partido NDP tin 90.432 voto y ta na cabez. Nan tin 6.131 voto mas cu Partido VHP cu ta na di dos lugar.
