Elmar a conecta profesionalnan cu futuro energetico di Aruba na FRED Expo Rotterdam

ORANJESTAD (AAN): E compania NV Elmar a participa pa di dos aña consecutivo na FRED Job Fair & Conference,

cu a tuma lugar diasabra 24 di October 2026 na World Trade Center (WTC) Rotterdam, Hulanda.

   E participacion aki ta forma parti di e esfuersonan di ELMAR pa atrae talento y crea oportunidadnan pa studiantenan y profesionalnan di Caribe interesa den un carera na Aruba.

   E booth di Elmar a conta cu un bon bishita durante e job fair, unda nan Team di Recurso Humano a conversa cu profesionalnan tocante vacaturanan di trabao pa 2026, como tambe oportunidadnan cu compania tin programa pa 2027.

   Pa prome biaha, Elmar a forma parti di un panel di discusion na FRED Expo, bou di e tema “Keeping the Island Running: Aviation, Energy & Tourism as Economic Engines.” E panel a brinda oportunidad pa intercambia ideanan y experiencia tocante e desafionan y oportunidadnan den sectornan esencial pa economia di Aruba, como tambe pa comparti esakinan cu e studiantenan y profesionalnan presente.

   Cu su participacion na FRED Expo, Elmar ta sigui crea conexion cu talento na exterior y stimula interes den oportunidadnan profesional den sector energetico di Aruba.

   Interesa den un carera na Elmar? Bishita nan website di carera na career.elmar.aw pa explora oportunidadnan di trabao y descubri con bo por forma parti di e team di Elmar.