General Onno Eichelsheim a bishita personal militar den Caribe Hulandes

Comandante di Forsanan Arma

ORANJESTAD (AAN): E oficial militar di rango mas halto di Ministerio di Defensa, Comandante di Forsanan Arma,  General Onno Eichelsheim, a haci un bishita di trabao na Defensa den Region Caribe durante e ultimo dianan. Durante e bishita aki, Eichelsheim a bishita diferente unidad y kazerne.

   Durante su bishita na Aruba, Eichelsheim a bishita Kazerne di Marina na Savaneta y a subi e barco di stashon Zr.Ms. Friesland pa e dia anual di nabegacion relacional.

   General Eichelsheim a papia cu personal militar tocante, entre otro, nan contribucion na operacionnan di combatimento di droga y e sosten na polis y autoridadnan local.

   Segun e General, Region Caribe semper ta un ‘region den movecion’. “E parti Caribense di Reino nunca ta para keto. Hunto cu autoridadnan local, coleganan di Marina, Ehercito, y Marechaussee ta disponibel tur dia pa garantiza siguridad di e islanan. Operacionnan di combatimento di droga, tareanan di alivio di emergencia, y apoyo na autoridadnan local ta tareanan importante pa Defensa den Region Caribe.

   Ademas di e tareanan regular aki e region durante e ultimo aña tabatin di haber cu e tensionnan entre Merca y Venezuela.  Nan personal militar aki a duna un contribucion significante na visualizacion di e situacion, y mas cu tur cos, na proteccion di e islanan  Mi tin un aprecio grandi pa esey. Al final, hunto nos ta mantene e islanan sigur, sea cual sea e menaza.”

   Gobierno Hulandes ta inverti den Defensa pa sigura cu forsanan arma ta cla pa mantene Reino y aliadonan sigur. Pa Region Caribe esaki ta encera tambe un inversion den, entre otro, radarnan, medidanan contra Drone, aumento di horario di vuelo pa Wardacosta, y presencia permanente di un unidad di Marina. Defensa tambe ta invertiendo extra den ekipo, armamento, y infrastructura di Militar Caribense (CARMIL), cu ta hunga un rol importante den siguridad regional.