Durante reunion publico na Parlamento
- A yega momento pa tuma decision riba salario minimo
ORANJESTAD (AAN): Prome minister Mike Eman, hunto cu su coleganan minister a participa den fin di siman na un sesion di Parlamento di Aruba. Durante su disertacion, Eman a enfatisa e necesidad pa acerca salario minimo na bestaansminimum den tres fase, combina cu medidanan di alivio pa empresanan, particularmente esnan chikito y mediano.
Riba agenda di Parlamento tabatin dos proyecto di ley. E prome ta trata modificacion di Presupuesto di Pais Aruba pa 2026, incluyendo presupuesto di Dienst Openbare Werken (DOW) pa 2026. E di dos proyecto ta trata modificacion di legislacion tocante documentacion hudicial y declaracion di bon conducta (VOG), cu e obhetivo di mehora eficiencia administrativo relaciona cu e pago pa solicita e declaracion aki.
Durante su disertacion, e prome minister a pone atencion tambe na e situacion economico y social di nos comunidad, especialmente e dificultadnan cu hopi famia ta enfrenta pa cubri nan necesidadnan basico.
Salario husto y crecemento economico: Eman a indica cu, durante hopi aña, Aruba a conoce crecemento economico, particularmente den sector turistico, pero cu un parti di nos comunidad no a beneficia suficientemente di e prosperidad aki. Segun e prome minister, ta inaceptabel cu personanan cu ta traha tempo completo ainda tin dificultad pa cubri nan necesidadnan basico. Den su disertacion, Eman a haci referencia na diferente estudio y conseho cu Gobierno a solicita den preparacion di e propuesta pa aumenta salario minimo.
Entre otro, el a menciona e investigacion di Economisch Bureau Amsterdam (EBA), cu segun su splicacion ta indica cu inflacion na Aruba ta principalmente consecuencia di importacion di productonan. E estudio ta indica cu no ta spera un efecto significativo riba e prijsnan general como resultado di un aumento di salario minimo. Tambe el a referi na e conseho di Sociaal-Economische Raad (SER), cu a indica cu e por sostene un aumento gradual di salario minimo den direccion di bestaansminimum, mediante un modelo cu diferente fase.
Dialogo cu sector comercial: E prome minister a dedica un parti importante di su disertacion na e consultanan cu Gobierno a intenta organiza cu e gremionan comercial. El a presenta un cronologia di e peticionnan pa conseho, e estudionan comparti y e invitacionnan pa reunion cu e representantenan di diferente sector.
Eman a remarca cu ta importante pa sigui dialoga y evalua eventual consecuencia economico di e aumento. Sin embargo, el a enfatisa cu ya a haci diferente estudio y cu ta yega un momento cu Gobierno y Parlamento mester tuma un decision.
E propuesta ta pa acerca salario minimo na bestaansminimum den tres fase, monitor su efecto riba inflacion, empleo y actividad economico. Na mes momento, Gobierno kier identifica e medidanan di alivio pa e empresanan cu por enfrenta e gastonan adicional di personal. Particularmente empresanan chikito y mediano, y esnan cu ta depende grandemente di man di obra, mester haya atencion den e proceso aki.
Crecemento economico mester beneficia comunidad: Durante su disertacion, Eman a referi tambe na e investigacion De schaduwkant van Aruba, cu ta pone atencion na desigualdad, problemanan social y falta di perspectiva pa hobennan den nos comunidad. E prome minister a relaciona e preocupacionnan aki cu e necesidad pa mehora poder di compra y combate di pobreza. El a enfatisa cu Aruba no por evalua su prosperidad solamente a base di cifranan economico y resultado di turismo, sin considera e realidad di famianan cu ta enfrenta dificultad financiero.
Tambe el a menciona e diferente alivio social cu Gobierno a implementa pa sostene e pensionadonan, empleadonan y personanan cu entrada limita. Segun Eman, e propuesta pa aumenta salario minimo ta un siguiente paso den e esfuerso pa mehora poder di compra di nos comunidad. E prome minister a referi tambe na experiencia di Bonaire y Saba, caminda aumento di salario minimo a wordo implementa. El a presenta e experiencianan aki como punto di referencia den e discusion tocante e posible efecto riba prijsnan y empleo.
Un inversion den futuro di Aruba: Pa Eman, un aumento di salario minimo no mester wordo mira solamente como un gasto adicional, sino tambe como un inversion den poder di compra y calidad di bida. Un empleado cu entrada mas justo ta den un miho posicion pa cubri su necesidadnan, sostene su famia y contribui na economia local. E prome minister a enfatisa cu e intencion ta pa yega na un sistema caminda salario minimo ta mas acerca na e costo basico di bida, sin perde di bista e necesidad pa mantene un sector empresarial saludabel.
Na final di su disertacion, Eman a haci un yamada pa comprension, dialogo y solidaridad entre Gobierno, Parlamento, gremionan comercial y comunidad. El a expresa su speranza cu tanto coalicion como oposicion por contribui na e proceso legislativo.
Segun e prome minister, acerca salario minimo na bestaansminimum ta representa un oportunidad pa conecta e crecemento economico di Aruba cu un mehor calidad di bida pa e personanan cu ta contribui tur dia na desaroyo di nos pais.
