Elmar a caba di drecha e kabel kibra di 60KV na Sabana Blanco

Trabao lo sigui na e substation

ORANJESTAD (AAN): E compania di electricidad Elmar, a duna un update importante relaciona cu e recien evento involucrando e kabel principal bao tera cu a sufri daño y e pasonan cu nan a tuma pa remedia e situacion.  NV Elmar a splica cu nan ekipo dedica a traha sin stop pa aborda e problema y sigura un solucion rapido.

   E bon noticia ta cu e kabel daña a keda drecha exitosamente. Cuminsando Diamars mainta, e ekipo ta trahando diligentemente pa eherce testnan pa verifica e integridad y seguridad di e kabelnan.

   Test y reactivacion: Diamars atardi, nan a cuminza e proceso pa reactiva coriente riba e kabel repara. E kabel aki lo pasa door di un test riguroso den e proximo 24 oranan pa sigura cu e ta operando na e nivel optimo di prestacion. E confiabilidad di nan servicio ta di suma importancia pa nan, y e fase di test aki ta duna NV Elmar e oportunidad pa confirma e stabilidad di e kabel repara.

   Si e fase di test ta bay segun plan y e kabel ta pasa tur evaluacion necesario, nan tin como meta pa inicia gradualmente e proceso pa pone carga riba e kabel aki, cuminsando for di awe.  E compania ta compronde e importancia di un transicion sin problema y nan ta dedica pa sigura un reintroduccion sigur.

   Reto continuo: Mientras cu NV Elmar ta haciendo avanse significante, nan kier keda transparente tocante e retonan cu ta enfrenta. Te cu awor, nan a realoca 3 kabel di 60KV for di e Substation bieu pa e nobo na Sabana Blanco. Nan tin 3 kabel di 60KV mas cu mester worde realoca. E proceso aki ta rekeri planificacion cu cuidao y ehecucion pa minimalisa cualkier potencial impacto riba nan servicio.

   Pa logra e proyecto aki, ta conta cu colaboracion di diferente departamento manera Team Innovation & Engineering, GIS, Team Grid Quality Management y Team Underground Services, y compania Prysmian di Hulanda. Danki pa nan esfuerso conhunto, y nan ta sigui avansa pa un futuro energetico mas stabil pa tur nan clientenan.

   Durante e periodo aki, pa sigura un servicio di coriente, manera ya menciona, nan ta haci un transferencia di carga di un area alternativo atraves di un otro stacion. E ta importante pa nota cu e transferencia di carga aki lo pone un esfuerso adicional riba e kabelnan di e red di distribucion alternativo, posibelmente causando un efecto di corto circuito. Na banda di e carga adicional door di e aumento di consumo di coriente actualmente durante temporada di calor. E ekipo di tecniconan lo monitor e situacion durante henter e periodo aki.

   Segun NV Elmar, nan  ekipo ta traha duro pa sigura un transferencia sigur y eficiente di e kabelnan restante. Nan ta aprecia comprension di comunidad y cooperacion durante e trabaonan necesario aki.  E compania lo continua pa mantene tur cliente actualisa tocante nan progreso.