ORANJESTAD (AAN): Manera ta conoci, desde Januari di e aña aki, e compania NV Elmar tin un structura nobo di organizacion.
Den e structura organizatorio nobo ta duna atencion dedica na e calidad di e grid di Elmar, door di acumula tareanan dedica na esaki den un Departamento riba su mes.
Desde 1 di juli 2023, despues di un periodo di transicion, e Departamento di Grid Quality & Inspection ta completo. Pa e tarea di inspeccion, a forma un Team nobo di Inspection cu awor ta parti di e Departamento nobo aki.
Hunto cu DTI, e siman aki nan a tene un sesion informativo pa e instaladornan reconoci por ser conoci cu e Team nobo di Inspection di Elmar. A duna un bista riba e cambionan cu Elmar lo aplica pa mehora e proceso, y a duna e oportunidad pa intercambia cu representantenan di Elmar, kende a brinda nan conseho valioso tocante con pa haci e proceso di aplicacion mas eficiente posibel. DTI a tuma e oportunidad pa recorda nan procedimentonan di inspeccion segun nan Landsverordening.
E compania di electricidad ta gradici DTI pa nan colaboracion. Nan a splica cu e sesion informativo tabata un exito, como cu e tabata un bon manera pa Elmar conecta cu e comunidad di instaladonan reconoci y demostra e compromiso pa brinda excelente servicio na clientela.
Bo por ta sigur cu Elmar lo continua tene sesionnan informativo pa nos stakeholders pa mantene un bon relacion. Esaki sigur no ta e ultimo!
