Elise Heronimo corona como Little Miss Nuestra Belleza Aruba

ORANJESTAD (AAN): Diadomingo anochi durante certamen di Miss Teen Aruba International 2025 den Paseo Herencia Ballroom,

a tuma un momento pa asina haci coronacion di un mucha muhe hopi simpatica y cu hopi briyo.

   Ta trata aki di Elise Heronimo, kende di chikito a mustra su habilidad di participa exitosamente den certamennan.  Na 2022 el a sali 1er finalista di Little Miss Beauty Aruba.  Na 2023 el a bira Mini Model Aruba.  Na 2023 el a participa den su prome competencia internacional, y a haya premio di Miss Social Media, y titulo di Top Mini Model World.  E mesun aña a bolbe competi na Little Miss Beauty Aruba, y e biaha ey a bay cu e titulo, como tambe e titulo Little Miss Fotogenica, Little Miss Talento, Little Miss Best Dressed, Little Miss Model, Little Miss Social Media, y Little Miss Disciplina.

   Na 2025 e ta actualmente ‘Prenda Cultural di Gucci Dancers’, y e anochi el a wordo instala y corona cu un titulo importante.

   Briannah Arrindell y Darienne Lampe a instala y pone su sjerp, y despues Briannah Arrindell a pone corona pa e titulo nobo di Little Miss Nuestra Belleza Aruba 2025.

   Awor e tin par di luna pa prepara, pa bay participa den e certamen di Miss Nuestra Belleza na Republica Dominicana na October venidero.