Sharine Croes-Dubero di Facilidad di Estudio:
* Maximo pa bin na remarca ta 42 mil florin pa aña
ORANJESTAD (AAN) E coordinador di Seccion Facilidad di Estudio di Departamento di Enseñanza, señora Sharine Croes-Dubero, den entrevista cu DIARIO, el a referi na e parti di subsidio pa mayor, cu e departamento ta brinda.
El a duna di conoce cu nan ta dunando subsidio pa buki y calculator machine, computer, laptop, y school bus, y locual ta nobo ta e parti di laptop, e otronan ta pa hopi aña caba nan ta yudando cu ne.
Pa tur esaki e entrada mester ta 42 mil florin, pasobra nan ta wak e entrada di mayornan hunto.
“Si e entrada ta bao di 42 mil florin nan por bin na remarca p’esey. Nan ta haya pa e buki y calculator machine e subsidio maximo ta 550 florin pa yiu, y pa computer y laptop 750 florin pa yiu. Por ehemplo, si e laptop ta sali bo 900 florin, bo ta paga 750 florin so”, Sharine Croes-Dubero a duna di conoce.
Croes-Dubero a agrega cu pa tur esnan cu ta haci uso di bus cuminza busca nan formulario pa yena nan, y sigui e caminda pa cana. Tur informacion ta riba website bao di subsidio pa mayor, unda ta indica precies kico ta e rekisitonan cu tin mester pa por bin na remarca pa e subsidio aki.
Sharine Croes a menciona cu e ultimo añanan e cantidad di mayor cu ta solicita subsidio ta bahando, kiermen e grupo ta birando mas chikito.
E subsidio pa transporte (scol bus-Arubus) tambe ta hopi importante pa e muchanan cu no tin suficiente recurso pa nan por yega scol.
Pa loke ta rekisitonan, señora Croes-Dubero a splica cu si e mayor ta cobra bijstand di Gobierno, e mester bay na Departamento di Asuntonan Social (DAS), yena un formulario, yen’e, bay DIMP unda nan ta wak cuanto e persona ta gana, anto dun’e un verklaring, cu e tin hib’e bek na Seccion di Subsidio y nan ta wak si e persona por bin na remarca of no.
