Eleccion nobo na Club Chines despues cu esun di Mei a wordo declara ilegal

*Zhao ta den proceso di wordo saca for di e club  - ORANJESTAD (AAN): Diahuebs mainta a tuma lugar un conferencia di prensa, unda cu abogado Anthony Ruiz a trece dilanti e ultimo desaroyonan rond di Club Chines.

Ruiz a splica cu normalmente e miembronan di directiva William Chengs y Steven Chen no sa tene conferencia di prensa den Club Chines.

“Manera boso sa, Club Chines ta un club unda cu e Chinesnan mes ta regla nan propio asuntonan y nan no gusta sali den publicidad”.

Sinembargo, debi na tur cos cu a pasa den ultimo lunanan desde Maart ocasiona pa un grupo di Chines cu a causa hopi daño na e comunidad Chines, a dicidi di tene e conferencia di prensa aki”.

Debi na e hecho cu e grupo ey di Chines si a busca publicidad y a atacha e bon nomber di e trankilidad cu e Chinesnan tin na Aruba, mi a wordo pidi pa e directiva pa prome biaha sali den publicidad, segun Ruiz.

E abogado a indica cu algun luna atras e otro grupo a para na e Club Chines y a papia hopi disparate y despues a pidi despensa.

Sinembargo, ora cu bo haci daño caba, no ta asina facil pa drecha esaki.

Ruiz a splica cu 18 di Maart diripiente un grupo di Chines a yega na e club y a cambio slot di e lugar y kier a haci un coup.

“Nan kier a tuma over mando di e club Chines”, segun e abogado.

El a splica cu Chengs y Chen den ultimo añanan a haci e club mas accesible pa tur hende y principalmente pa e hobennan cu antes no tabata sinti nan mes bon bini, manera cu nan ta sinti actualmente.

“Tin un otro grupo cu Chengs y Chen tambe stima, pero ta un generacion bieu cu no tabata sa di adapta nan mes na e reglanan nobo y innovacionnan nobo cu e club aki tabata kier bay dilanti cune”.

E grupo cu a funda e lugar aki ta di pensamento cu pasobra nan a funda e club, nan tin cierto derecho riba e lugar.

Sinembargo, e club aki ta di tur miembro y no di un grupo di 3 of 5 persona, segun Ruiz.

E abogado a sigui bisa cu tin un acto cu nan a entrega na notario, cu ta manera un bijbel di con e Club Chines mester wordo maneha.

El a splica cu den cuadro di esey por bisa cu tur e actuacionnan algun luna pasa di parti di principalmente señor Zhao, a pone tur Chines na Aruba den descredito.

“E accionnan di Zhao a causa masha hopi daño entre e Chinesnan, unda cu entre otro den un group chat tabata tin hopi tiramento di palabra”.

Chengs y Chen falsamente  a wordo acusa di varios asunto, siendo cu hustamente nan dos y otro miembronan di e directiva ta bezig aworaki ta restructurando e organizacion aki, pa haciele conforme ley, segun Ruiz.

El a splica cu e intencion di Chengs ta pa e sali for di directiva pa otro hende tuma over, pero su miedo ta cu e persona cu tuma over ta bay kibra tur locual el a logra den ultimo 2 añanan.

Na dado momento riba 1 di Mei e generacion cu no kier cambio a tene un eleccion pa kita William Chengs y Steven Chen for di e directiva, pero esaki no a bay segun e statutonan.

Pesey e directiva original (Chengs y Chen) na dado momento a bay corte declara e eleccion invalido.

Ruiz na dado momento a haci un peticion na huez pa declara e eleccion teni nulo y ora cu abogado di e otro banda a lesa e peticion, nan lo a realiza cu di berdad e eleccion no a bay na e manera corecto.

Abogado di e otro grupo acerca Ruiz pa nan yega na un areglo.

Un proceso verbal di 2 di Juni di corte ta confirma cu e bestuur cu a sinta despues di e eleccion na Mei ta ilegal y cu nan no mag di actua.

Awor un eleccion nobo ta bay wordo organiza pa e abogadonan, cu si ta bay ta uno legal.

Ta bay wordo determina kendenan tur ta miembro  y kendenan tur mester wordo saca for di e Club Chines, manera Zhao, kende a atacha e club.

“Nos ta den proceso tambe pa saca Zhao for di e club y  nos ta spera cu e club por keda den trankilidad”, segun Ruiz.

E eleccion ta bay ta dentro di 2 pa 3 luna.