Cu tratamento di ‘Plasma Afarese’ hoben a cuminsa para bek

ORANJESTAD (AAN): E nomber di e hoben ta D’Mitri Queeley, y e ta procedente di e isla di St. Eustatius.  Na luna di Mei el a bira malo, y pa un motibo of otro e no por a cana mas.

   Pesey mes, cu su mama el a bandona St. Eustatius y a viaha pa St. Maarten pa ricibi cuido medico.  Como diez dia despues, docternan na St. Maarten a dicidi pa mand’e Aruba pa e ricibi tratamento na Dr. Horacio E. Oduber Hospital.

   Awe su mama ta conta su storia y con un luna despues su yiu por para back riba su pia danki na e tratamento di ‘Plasma Afarese’ cu el a ricibi di Dr. Choudhry na Hospital di Aruba.

   Elaine Jeffrey ta mama di D’Mitri Queeley, y den un entrevista el a splica cu nan a bin Aruba riba conseho di Dr. Choudhry. Na nan yegada e hoben no tabata por a cana y tabatin hopi dolor!  A base di testnan haci, a conseha pa haci e tratamento conoci como ‘Plasma Afarese’ bao encargo di Dr. Choudhry. E dia cu nan a yega Aruba, di biaha a interna D’Mitri y e dia siguiente nan a cuminsa cu su tratamento.

   Como un mama pa mira con su yiu tabata, ta kibra su curason. “D’Mitri a ricibi un total di shete sesion di e tratamento di plasma afarese di cual despues di e prome caba tabata wak un adelanto paso e por a move su pia un tiki. Si esey a pasa den e prome tratamento, kico bo por spera despues di shete tratamento. Esey a duna nos mas speranza”, Jeffrey a duna di conoce.

   Pa e hoben Jeffrey, ta comosifuera Dr. Choudhry tabata manda pa Dios cu e tratamento aki. E motibo ta cu e Docter a splica detayadamente kico tur D’Mitri lo experiencia na momento di e tratamento.

   “E tabata cu nos constantemente. E tabata bin bisa nos di e tratamento, check D’Mitri”, asina e Mama Elaine a duna di conoce. E mama no ta sigur si asina dr. Choudhry ta brinda cuido, pero si ta asina e ta algo “awesome”.

   Awor despues di shete tratamento D’Mitri por para su so. Awor e mundo di D’Mitri ta completamente diferente, y tin hopi speranza p’e bay back na su bida bieu door di e tratamento aki di plasma afarese. Jeffrey a duna di conoce cu nunca el a experencia e trato manera cu el a ricibi na HOH. E staf, e nursenan, incluso e trahadonan di siguridad ta trata bo cu hopi amor y manera famia, el a duna di conoce. “Semper nan ta eynan, nan kier yuda.

   E hoben D’Mitri a duna di conoce cu ora el a yega Aruba, e tabatin hopi dolor y no por haci hopi cos. Pero awo un luna despues ainda e tin mas pa bay. Te awo tur cos ta bayendo bon. “Mi kier gradici tur hende cu a atende mi. Cu a pone mi sinti bon”, el a duna di conoce.

   “Mi tin di bisa danki. Aki ta e caminda cu bo mester ta ora bo bira malo”, Jeffrey a termina expresando.