Minister Gerlien Croes:
ORANJESTAD (AAN): Den un paso significativo pa fortalece lasonan educativo regional, Gobierno di Aruba/Colegio EPI y Stichting Scholengemeenschap Bonaire SGB (MBO Bonaire) a firma un acuerdo di colaboracion cu ta formalisa e cooperacion entre e dos institucionnan riba area di formacion, innovacion y intercambio di material educativo.
E acuerdo a worde firma den presencia di Minister di Relacionnan den Reino, Educacion, Hubentud, Innovacion y Deporte, mr. Gerlien Croes, cu ta representa Gobierno di Aruba y Colegio EPI, y mevrouw L. Wolff, unit directeur MBO, pa SGB MBO Bonaire.
E colaboracion ta basa riba un meta comun: eleva e calidad di educacion intermedio profesional (MBO) den region y promove un cultura di Leven Lang Ontwikkelen (LLO)- siña y desaroya durante tur etapanan di bida.
E acuerdo ta contempla cu SGB MBO Bonaire, como coordinador principal, lo pone na disposicion materialnan educativo y administrativo cu a worde desaroya den colaboracion cu partnernan di desaroyo. E material ta inclui tanto guianan pa docentenan, plan di les, syllabi, guia digital, como tambe modelonan pa maneho interno y proceso educativo.
Pa Colegio EPI, e acuerdo ta representa un gran oportunidad pa: (1) Amplia y modernisa su programa di formacion profesional. (2) Intercambia experiencia y metodonan di educacion cu otro institucionnan den Caribe. (3) Fortalece relacion cu Hulanda y e region riba base di conocemento y innovacion.
Minister Gerlien Croes a expresa su satisfaccion riba e paso aki, destacando e balor di colaboracion educativo den region, principalmente den reino: “Nos ta kere cu educacion ta mas poderoso ora nos siña y crece hunto. E colaboracion cu SGB MBO Bonaire ta un ehempel di con nos institucionnan por comparti recurso, experencia y inspiracion pa brinda un educacion di calidad cu ta prepara nos hobennan pa un futuro sostenibel”.
E proyecto ta un paso importante pa fortalece e red educativo den Caribe, pa promove excelencia academico y pa crea mas oportunidad pa nos studiantenan y profesionalnan.
