Edwin Willems a haya hopi apoyo pa su manifiesto tocante cambio den Ley di Trafico

Cu pancarta y potret di victimanan:

ORANJESTAD (AAN) Edwin ‘Scribel’ Willems, yiu di e señora cu a muri a victima di un “hit & run” dilanti Renaissance Mall, ta e persona cu a prepara y presenta un manifiesto na Parlamento, cu e intencion di wordo scucha y bin cu un cambio den e Ley di Trafico mas pronto posibel.

  E hoben a entrega e manifiesto Diasabra cu a pasa, esta 24 di Januari, hunto cu un grupo di apoyo, cu a bin cu pancarta, y na e momento ey el a duna su declaracion tambe, pa miembronan di prensa, parlamentarionan y publico presente. Riba e manifiesto tin 15 punto di atencion.

   “Mi a entrega e carta di firma door cu tin un fenomeno di ‘hit & run’ na Aruba cu for di añanan y nada ta wordo haci, dia pa dia ta bira peor, cobrando victimanan, bida di hende, dañonan material, lagando hende mancaron.”

   “Pues awe nos a bin trece un peticion pasobra Aruba no ta wanta mas ‘hit & run’, no ta wanta cu mas hende inocente tin cu bay pa nos haci algo”, Edwin Willems a expresa.

   El a agrega cu den e cinco dianan cu nan a colecta firma, a yega casi 8 mil firma y a menciona cu mayoria di persona cu a firma a comenta cu nan ta furioso cu e parti hudicial, y cu aki na Aruba no tin husticia, no tin castigo.  E total di firma a yega na 7.694.  Tur esey colecta den 5 dia di tempo.

  Ademas di pancarta a trece potretnan di personanan cu a muri como victima (peaton) di dalmento cu auto riba caminda, unda tin mensahenan manera “no mas hit & run” na Aruba!