Edificio renoba na WEB a haya nomber di Boey Marchena Building

Edificio renoba na WEB a haya nomber di Boey Marchena Building

Cu un centro di control 'State-Of-The-Art' pa produccion di awa

ORANJESTAD (AAN): Un edificio full renoba a drenta den funcion na WEB na Balashi.  Diabierna a tuma luga e ceremonia inaugural di Professor Doctor Ingeniero Filomeno A. (Boey) Marchena Building. E edificio historico (1957) riba tereno di WEB ta completamente reconstrui y transforma den un centro di control ‘State-of-the-Art’ pa operadornan di produccion di awa di bebe pa e isla.

   Como acto simbolico a devela e nomber di Filomeno Boey Marchena riba e edificio. Di e forma aki a honra e pensionado di WEB, kende a hunga un rol hopi importante den desaroyo di desalinacion di awa di laman pa awa di bebe.

   Sr. Boey Marchena ta un promotor di taya pa awa di bebe, un catedra universitario, reconoci regional y internacionalmente. “Ta un honor pa dedica e edificio y centro di control nobo na Boey. Nos ta considera tanto e edificio como e centro di control como simbolonan poderoso di renacemento y desaroyo di sector di produccion di awa di WEB Aruba, pa cual Boey semper a boga cu hopi fervor! No por tin un mihor momento y oportunidad pa a efectua e dedicacion aki”, ta loke e CEO di WEB Aruba, Alfredo Koolman a expresa durante e ceremonia.

   Produccion den propio maneho Sr. Koolman a indica tambe cu ta sumamente importante cu pais Aruba tin produccion di awa di bebe den propio maneho. E no ta solamente un decision financiero pero sigur tambe uno strategico, en bista cu no tin otro fuentenan di awa di bebe riba e Isla.

   E centro di control ta ekipa cu instalacionnan sofistica pa vigila e proceso di produccion di awa, mientras cu fisicamente for di un posicion strategico tin bista riba e plantanan di awa. E proyecto a rekeri un inversion di 5.4 miyon Florin y ta forma parti di un cadena di proyecto pa enfrenta WEB e retonan pa cu produccion di awa.

   Otro proyectonan ta un canal nobo di entrada di awa di laman pa planta SWRO-2, renobacion di plantanan existente SWRO-1 y SWRO-2, construccion di tankinan nobo di awa pa Jaburibari, Urataca, Juwana Morto y introduccion di meternan di awa inteligente.

   Cu esaki WEB ta percura pa por keda cumpli cu demanda di awa cu ta creciendo.

   Donacion: Manera ta custumber pa proyectonan di e magnitud aki y como contribucion na un sociedad sostenibel, WEB Aruba a haci un donacion na Aruba Scholarship Foundation. E fundacion a ricibi un suma di 10.000 florin pa contribui na educacion tecnico di hobennan di Aruba.