Inhusticia a wordo comete cu creacion di un peso pa nan futuro
*Nan bienestar fisico y mental ta prioridad di henter comunidad
*Mester crea e mundo den cual nan por sirbi un comunidad sano
ORANJESTAD (AAN) — Den un situacion mundial y local sumamente dificil, mucha y hoben na Aruba ta bolbe of haci nan entrada na school.
Comunidad ta exigi un dedicacion total di nan banda y na mayoria di cas, mayornan lo no acepta pa nan resultadonan no honra loke e mayornan ta spera.
Ora papia di mucha y hoben, hopi bez ta compara mucha di awor cu mucha di un antes completamente diferente den cual e mucha generalmente no tabata biba cu situacionnan sumamente dificil.
Separacion di mayornan, cu cada uno ta crea nan propio mundo, ta crea sentimentonan di duda y falta di seguridad cerca un mucha.
Falta di atencion den un mundo cu hende ta comunica cu app, hasta si nan ta sinta den reunion cu otro.
Noticia cu ta drenta casnan ta carga cu criminalidad, guera, morto, desesperacion di un mundo cu no sa kico haci cu su mes.
Esaki ta e realidad di e generacion cu awor ta bishita school pa habri caminda di nan bida, cu ta exigi cooperacion di henter comunidad.
Mester cuminsa scucha mucha atrobe. Esaki ta uno di e problemanan grandi pa mucha, cu ta ricibi telefon, placa, keds di marca, pero no ta ricibi e oportunidad di splica kico ta sconde den su curazon y e situacionnan cu e no ta comprende.
Mester scucha e mucha atrobe. E mucha cu ta sconde su dolor na su manera ora e mester atende cu un mama of un tata, cu no ta parti di su famia mas y a wordo reemplasa dor di otro cara cu ta yama su mes e cabesante nobo di famia.
E mucha mester acepta cu e tin mas ruman, cu no a nace den su cas, pero ta ocupa su lugar den bida di su tata.
Hopi adulto no ta para keto na e problema serio cu un divorcio ta nifica pa mucha y entrada di caranan nobo den nan famia.
Problemanan cu ta cambia caracter di e mucha cu no por comprende pakico e mester comporta su mes si mayornan no ta comporta su mes.
Pobresa ta afecta cantidad di mucha rond mundo. Prijs di articulonan ta subi y e mucha cu a ricibi tur loke placa por ofrece, diripiente tambe ta victima di costo di bida y no por ricibi tur loke tabata regala su persona pa asina e no molestia mucho.
School a habri su portanan. Den un calor pisa, lo mester splica e mucha cu clima ta cambia y cu na momento cu e ta adulto, lama por a subi tera.
E mucha cu awe ta bishita school lo mester comprende cu na momento cu e por traha e mester paga pa proyectonan PPS y otro debenan cu ta su herencia.
Aruba pues mester evita di crea mas debe pa futuro generacion paga.
E mucha di awe lo ta gobernante den futuro. Con e lo goberna? Con e lo mira politica? Con e lo pensa di gremionan, di sindicatonan, di comerciantenan?
Kico e mucha di awe lo pensa di e balor di honestidad. Di prefera pobresa?
Rapportnan internacional ta mustra riba e problemanan serio cu mucha ta enfrenta actualmente.
Muchanan, cu den silencio ta sclama pa atencion di un mundo egoista cu no ta mira cuanto dolor ta sconde tras di e generacion cu ainda no por protesta!
