E vacunacion aworaki ta exclusivamente pa personanan di riesgo riba diamars cu diahuebs

Jurette Croes, PR di DVG:

*Den diferente bario

ORANJESTAD (AAN) – Den entrevista cu DIARIO, señora Jurette Croes, Relacionista Publico di Departamento di Salud Publico “DVG”, a menciona y reiterando cu enfasis cu e vacunacion aworaki ta solamente pa personanan di riesgo, a duna di conoce cu for di siman pasa, riba tur diamars y diahuebs, DVG ta bishitando diferente bario pa aplica e vacuna di influenza, Covid-19, of ambos hunto.

Siman pasa a cuminza na Compleho Deportivo Frans Figaroa (Noord), y e siman aki e dianan 14 y 16 di November lo ta na Centro Playa Pabao; otro siman, dia 21 y 23 lo ta na Centro Betico Croes na Santa Cruz; e dianan 28 y 30 di November ta bay ta na e parkeo di Arubus na San Nicolas, y Diamars 5 di December, na Centro Lago Heights na San Nicolas.

“Tambe DVG su departamento di malesanan infeccioso ta habri di Dialuna pa Diabierna di 8’or te 12’or y atardi di 1’or pa 4’or cu tambe por pasa eynan ‘walk in’, pa haya e vacuna di Covid of di Influenza, of por haya ambos na mesun momento”, Jurette Croes a indica.

Croes a recalca cu e campaña aki ta exclusivamente pa e grupo di riesgo. “Nos sa cu tin personanan den edad di 18 pa 59 aña cu no ta na riesgo, nan ta saludable, pero toch pa precaucion nan ta tuma e vacuna.  E personanan aki no ta bin na remarca aworaki. Bo no por cumpra e vacuna. E vacuna ta gratis na e momentonan aki pa e personanan di 60 aña bay ariba, e ta cubri pa AZV pa personanan cu tin malesa cronico of pa esnan cu normalmente tur aña docter ta aconseha nan pa tuma e vacuna. Nan ta bay cerca nan docter di cas, haya un receta, y ora nan ta bin cu e receta nan ta haya e vacuna completamente gratis. Pues, un bez mas mi ta aconseha nan subi riba facebook di directie volksgezondheid Aruba busca informacion di e diferente grupo di riesgo y pa cada un tin diferente maneho. Tin cu tin cu busca un receta y tin cu no tin cu haci esaki, por ehemplo esnan cu ta na cas inmovil riba cama, nan tin cu yama nos, y nos tin un team pa yuda nan”, Jurette Croes, PR di DVG a conclui.