ORANJESTAD (AAN): Biblioteca ta regala cada mucha cu bira miembro nobo un buki nobo. Un buki nobo titula ‘Na cas di Carmen y Carlos’.
Un buki cu biblioteca a publica pa tur mucha na Aruba. Miembrecia ta gratis.
Pa registra como miembro, mayor ta hiba nan yiu biblioteca (sea Playa of San Nicolas) y ta hiba un ID valido y e carchi AZV di nan yiu. Biblioteca ta warda tur mucha cu un coleccion grandi di buki masha bunita mes, hopi storia y hopi informacion pa scol. Bini un bini tur!
Na cas di Carmen y Carlos: ‘Na cas di Carmen y Carlos’ ta inspira pa e tema ‘Mi buki, mi cas’. E buki aki ta un regalo pa e muchanan di Aruba. Autor ta Jeroen Hoogerwerf y e buki a keda ilustra pa artista visual Vanessa Paulina. Tur dos a participa tambe na e festival y a bishita diferente scol pa conta storia. ‘Na cas di Carmen y Carlos’ ta un buki na 2 idioma, Papiamento y Hulandes.
Esaki ta un storia di un famia cu ta pasa un vakantie masha dushi mes. Carmen y Carlos ta prima y primo y nan ta mustra e lesado con cos ta bay cerca nan na cas.
