E ultimo aña cu Erin Croes mes lo presenta ‘Na Drempel di Fin di Aña’

Diabierna e programa lo cuminsa

ORANJESTAD (AAN): Riba e di dos Diabierna di luna di October, manera el a bira un gran tradicion di hopi aña caba, e programa radial cu ta hala atencion grandi y cu ta marca e inicio di e temporada festivo aki, esta Na Drempel Di Fin Di Aña ta bay cuminsa. E aña aki, ta un celebracion hopi mas special pasobra ta bay recorda cu e programa a start 35 aña pasa, kiermeen ta bay ta algo magistral.

  E biaha aki nan tin como tema: ‘Gratitud ta e palabra magico’.  E aña aki ta bay bira mas interesante pasobra esaki lo ta e ultimo edicion cu Erin Croes mes lo presenta.

Tur aña e oyentenan fiel ta den espectativa pa sa kico e programa Na Drempel Di Fin Di Aña tin pa presenta pa su fiel oyentenan.

   Locual ta haci e programa aki unico ta su seccionnan original, idea y premionan special cu e show ta trece cune, manera “E storia pa Inspira” y “Ora Classico”. Otro seccion cu tambe a bira masha gusta y popular e ultimo añanan ta “Arubanita” cu lo tey un biaha mas. Lo reparti varios premio cash como tambe e Santa Baskets cu lo keda reparti mey mey di fiel oyentenan.

   Nan lo tin e segmento nobo ‘Nos Heroenan Scondi’, unda lo busca e heroenan cu nunca ta haya reconocimento of premio, pero ta contribui, colabora na nan forma cu e bienestar di esnan mas vulnerable.  E show lo start Diabierna awor den oranan di anochi.