E prome ekipo nacional di robotica a representa Aruba durante competencia internacional na Singapore  

 ORANJESTAD (AAN): The STEM Embassy a crea e prome ekipo nacional di Robotica cu lo representa Aruba na un competencia Internacional di Robotica yama FIRST Global Challenge cu ta tuma lugar na Singapore.

            E ekipo di Aruba ta consisti di hobennan Trevor van der Biezen (18), Janelle Giromus (16), Guiyan de Nobrega (16), y Timothy Romain (18).

            E hobennan a conoce otro na ‘Ki’ ta bo STEM?’ summer camp organisa door di The STEM Embassy. Laura Croes y Jillian Oduber, miembronan di The STEM Embassy, lo coach e hobennan durante e competencia cu a tuma lugar 7 - 10 di october 2023.

            FIRST Global ta un organisacion cu un mision simpel; promove Ciencia y Technologia entre hoben. Nan ta hasi esaki posible organisando ‘The FIRST Global Challenge’ unda mas cu 191 pais lo competi na un Competencia olympico di Robotica, enfocando riba energia sostenibel manera solo, biento, y awa. E tema di e aña aki ta ‘Hydrogen Horizons’ unda e hobennan mester diseña y programa nan mesun robot.

            Mescos cu The STEM Embassy nan mision ta pa inspira e hobentud pa explore e ramonan di STEM y pa mustra nan cu nan por bira e lidernan cu por resolve e desafio nan cu nos planeta ta pasando aden. The STEM Embassy ta un organisacion consisti di studiante y jong professionals di Aruba y Corsou cu ta situa na Hulanda, Merca y Suiza cu kier lanta curiosidad y confianza den STEM riba tur e islanan ABC. STEM ta para pa estudionan den e area di Science, Technology, Engineering y Mathematics (Ciencia, Tecnologia, Ingenieria y Matematica).