E storia di Juan Dominico Werleman mira como ‘Baluarte di Angochi’

In Memoriam

Den un famia di cunukero a nace dia 10 di juni 1943 humildemente riba e punto di sero pazuid na Angochi, patras den e mondinan di Santa Cruz, Juan Dominico Werleman (Juan Chikito). Esaki tabata den e epoca di busca awa cu burico y su halifat. Un famia consisti di mama Machi Nina y tata Juan Grandi y 14 yiu. Juan Chikito tabata e di 11 yiu di Juan Grandi y Machi Nina. Juan Grandi tabata e famoso mansado di burico cu a mansa burico pa tur su bisiñanan den e epoca prome cu auto. Juan Chikito hunto cu su 13 rumanan a crece na e cas di su mayornan, e cas cu e prome auto, e prome generator den bario y e prome telefon na pal’i telefon.

   Reconocimiento y nomber di cariño: Conoci como Juan Chikito na Aruba y tambe cariñosamente conoci como “Mo Juan”, “Pachi”, “Pachi Juan” of “Skip”, den bisindario. Na Caracas, Venezuela e ta conoci como: “Juan de Nederland”. “Skip” ta un nomber specificamente uza entre su amigonan futbolista, cual tabata forma pa un gran parti door di su rumannan y su subrinonan.

   Den futbol nan tabata tin codigonan como nomber, pa asina e contrincantenan no por a alinea ta unda e bala tabata bayendo, ni sa ken pa sigui. E trofeo di mas grandi cu bo por a gana den famia Werleman ta un nomber di cariño, ta cosnan cu placa no por cumpra. Den su mundo profesional, su amigo y mentor mas stima tabata Wim van Helvoort.

   Su trabao y contribucion na desaroyo di nos pais: Juan Chikito tabata tin un vision y deseo pa core e tuberianan di WEB rond di e isla completo, y asina crea cuponan di trabao den un epoca di scarsedad, hopi mas prome cu e status aparte. Ta hopi hende a haya trabao. Campeon ta reconoce campeon. Marduga e ta lanta, pasa busca su balente trahadonan. Tur sinta den baki di Pickup Carioca, cu nan cuminda di merdia den man.

   Tambe Juan Chikito a dirigi proyectonan di construi hopi caminda nobo di asfalt den e epoca di camindanan di tera y instalacionnan di desaroyo, verkaveling y di barionan nobo. Den e mundo di deporte e tabata e prome den Caribe cu independientemente a traha e canchanan di tennis di asfalt, un conocemento cu a hera worde importa di afo, cu ekiponan caro y innecesario.

   Su contribucion na desaroyo di Deporte y Cultura: E prome di varios ta na Costa Linda, den e epoca unda cu nos historia di time-share a cuminsa. Prome cu esey, den e mundo di Drag Racing e a dirigi e proyecto pa traha e Pista di Palo Marga. Pero tambe e contruccion di e veld di SV. Caravel y SV Sportboys. E cas di Dera Gay, e orguyo y evento preferi di su difunto tata stima. (Un tradicion cu nan a bin cu ne ariba, desde e tempo cu e tata tabata dirigi Club Trappers). Sportboys, tambe conoci como e cas di hisamento di fli, unda cu e isla completo tabata bin competi, principalmente Angochi y bisindario.

   Su balornan y filosofía di bida: Como un persona cu a biba politica y historia di su pais di cerca, su deseo semper tabata pa no tin mas pelea entre colornan, sino amor y cariño cu enfoke pa cu e desaroyo y expansion di nos pais cu adelanto di nos pueblo prome. Pa cuida e tiki mondi cu a resta, apoya nos cunukeronan y trece nos cunucu nan back.

   Re-introduci esaki na e generacion cu ta bini: kico ta nos cumindanan, remedinan di tera, e maneranan y sacrificio di nos grandinan di antes. Nunca e tabata un persona materialista, semper el a bisa, rico of pober, nos tur ta bay den e mesun caha. Rikesa ta loke bo por comparti cu esnan cu bo ta stima of cu ta den un momento di necesidad.

   Su aprecio pa su famia y comunidad: Na su hogar semper tabata tin un manera pa rek e cuminda, pa cualkier bishita inespera. Mescos cu su tata, cualkier porta cu e lo por a habri pa un ser ker’i, cu mil amor el a habri’e.

   Den e epoca di paga lomba cu lomba, e tabata yena cu felicidad, cada bes cu e wak e bandera di spantenbier bay halto y wak un famia nobo ta drenta nan hogar. Cada bes cu el a pone dak riba un cabes, ningun hende no tabata tin mester di sa, basta cu e muchanan por a bay scol, caba nan estudio y e cabesnan di famia haya un caminda pa por sosega despues di a pone pan riba mesa. Algun di nan ta lidernan den comunidad awendia.

   Su amor pa bestia: Su burico preferi tabata yama ‘Bencho’. Bencho tabata e burico di su ruman muhe mayo y su recien casa. Hunto nan tabata bay busca awa na Lagabena, Sabanilla Abou of Andicuri. Unda cu nan ta pasa den tur e seronan patras pa nan por bin back cas durante su infancia.

   Su cabrito preferi tabata yama: Dal’e Cảcho. Un dia su tata a yega cas haya e cabrito su cara tur na hariña, y e bisiña mal rabia. Y asina atardi, pa ora e mes a yega cas el a haya sa cu nan y e bisiña a haya suficiente carni pa sopi y stoba.

   Su ultimo adios y legado: Diasabra awo famia, amistad y conocirnan lo hibe na su ultimo luga di sosiego. Un homber semper dasha, cariñoso y atento. Hende di tur hende, tremendo yiu, ruman, subrino, primo, casa, tata, welo, bisawelo, omo y amigo.

   Awo e ta bay acompaña su kerida esposa den feliz memoria. Cu Luz eterno lusa pa nan, pa nan por sosega na Paz. Uni un biaha mas.