John Freddy Montoya:
*Pero mester sigui pusha pa rebiba e arte aki
ORANJESTAD (AAN)—John Freddy Montoya, funcionario di Departamento di Cultura Aruba (DCA), den entrevista cu DIARIO a expresa, cu e desaroyo di teatro na Aruba, ta uno hopi interesante, pero mester sigui pusha pa rebiba e arte aki. E entrevista aki ta en conexion cu Dia Mundial di Teatro.
“Pero nos mester sigui pusha pa rebiba loke ta e arte aki, cu ta e Alma Mater di tur otro disciplina di arte, incluso di Cine. E ta un trabao grandi cu nos mester sigui desaroya p’asina aki genera no solamente calidad di nos teatro, sino tambe e participacion di hopi escritor, autor, director, actornan, academianan, pa nos por sigui mustra e rikeza di teatro, cu ta un medio, un disciplina artistico na unda nos por sigui educa”, Montoya a expresa.
El a sigui splica cu teatro ta un medio unda nos por expresa nos bida diario, nos sentimentonan. E trabao di un actor asina aki, por bisti e zapato di otro pa por interpreta den carni propio e sentimentonan di otro, presenta den liñanan largo y corto, e traumanan di e bida social, dolor, frustracionnan, soñonan, fantasia, realidad.
“Teatro na Aruba tin su historia. Actualmente ta hopi loke mester traha, p’asina aki fortalece e grupo di teatro, na unda nos por traha den ekipo. Traha den ekipo ta un trabao hopi grandi cu nos mester siña na Aruba, y den e diferente islanan. Naturalmente, cada isla tin su balor pa loke ta trata teatro, pero nos no tabata tin un escenario central na unda nos por uni tur e filosofianan”, Montoya a señala.
El a subraya cu ta bon pa nos tin diferencia di pensamento, di genero y di estilo, pero nos mester percura pa den e union aki nos por sa, con multi artistico nos ta.
Teatro riba su mes tin diferente estilo: comedia, drama, etc., pero kico ta pasa ta, cu Aruba ta considera teatro, solamente un di e generonan cu ta comedia. Nan ta puntra, “hey, abo ta haci comedia?”
“Pero comedia ta djis un genero. Tin obranan subrealista, realista, vanguardista, experimental, contemporaneo, moderno , clasico. Obranan clasico cu ta e estilo madre di tur esaki; y, naturalmente, e teatro custumbrista, teatro di caya, danza teatro, proyectonan multidisciplinario”, John Freddy a relata.
El a señala cu aki na Aruba no tin e conocimento amplio pa bisa cu teatro ta mas cu un comedia. “P’esey nos no ta haci comedia, nos ta eherce e funcion di teatro como director, actor, escritor, productor, y ta un balor hopi grandi pa na Aruba nos celebra Dia Mundial di Teatro”, Montoya a indica.
