Relacionista Publico Shelby Maduro:
ORANJESTAD (AAN): E weekend tan spera ta yegando! Pueblo di Aruba ya ta cla pa acudi na e evento principal di Rotary Club of Aruba pa recauda fondo, esta e grandioso Fiesta Rotaria.
Preparacionnan ta andando di algun tempo caba y ta asina leu cu por comparti cu un y tur pa marca e fecha di 30 di maart 2025. E diadomingo aki, un biaha mas lo tin e feria di articulo, cuminda y diversion di mas grandi riba e isla tumando luga riba parkeerplaats di Stadion Guillermo Prospero Trinidad na Dakota.
Den un entrevista cu Relacionista Publico di e club, esta Shelby Maduro, el a comparti varios detaye di e evento, ademas di e invitacion na comunidad di Aruba pa asisti y aporta.
Durante siman ya caba containernan a yega na e parkinglot di Stadion, incluyendo materialnan di sosten pa bay crea diferente tent pa asina ricibi y ofrece pueblo monton di producto y premio.
Shelby a indica cu desde aña pasa ora cu e Fiesta Rotaria 2024 a finaliza, nan a cuminza ta recauda producto y mercancia cu ta bay wordo ofreci na e evento di e aña aki. Ultimo lunanan e colect di productonan a intensifica.
Cu containernan yen, ya a cuminza setup e lugar pa asina por tin tur cos full cla pa Diadomingo mainta esaki start. Corda bon cu nan lo usa tur espacio cu tin rond di Stadion, incluyendo Aruba Entertainment Center.
“Fiesta Rotaria ta un fiesta pa famia, pues nos ta habri pa 9’or di mainta y bo por yega pa desayuna cu coffie di Island Grind, lo tin pastries, cos dushi, pastechi, croket,” Maduro a indica.
“Merdia nos lo tin e Food Court pa asina pueblo por come almuerzo y lo tin diferente plato pa 15 Florin e aña aki, y bo por escoge Chicken Sate of Barbecue Ribs. Tambe nos tin e otro banda di Stadion, tin seccion pa muchanan cu Popcorn, Hotdog, Pastechi, etc,” Shelby Maduro a indica.
Tambe na Fiesta Rotaria lo tin un Bar bon surti. Maduro a indica tambe cu mainta lo tin entretenimento pa publico tambe. Aki e ta referi na Club di Movimento, Kibrahacha, y tambe Pierewietje. Durante dia lo tin diferente DJ di Megateca Genie pa pone ambiente. Atardi lo tin Rincon Boyzz pa duna presentacion.
“No preocupa cu solo, pasobra nos lo bay tin suficiente Tent y tambe lo tin mesa cu stoel pa asina bo por sinta henter dia cerca nos,” el a agrega.
Seccion Hardware y Homeware: Shelby Maduro a corda cu nan tin e seccion aki cu lo bay bende verf, cama, cashi, airco, y diferente mercancia cu a ricibi di comerciantenan. Tambe tin algun artefacto electrico. Esakinan sigur lo bay manera pan cayente mainta.
Tambe na Fiesta Rotaria 2025 lo tin e Seccion di Supermarket y aki lo tin comestibel na bon prijs y esakinan hopi biaha ta wordo full bendi den como 2 ora di tempo, pues bo tin di yega trempan pa esey.
Otro interes grandi semper ta pa e Seccion di Mata, y aki bo por cumpra planta rapidamente como cu esakinan tambe ta hopi popular y ta wordo bendi vap-vap.
Henter dia nan lo ta bendiendo Rifa pa premionan atractivo na e Wheel-of-Fortune, unda por gana e.o. bais y premionan similar.
E premio grandi mes lo bay ta atardi pa 5:00 pm. E rifanan pa esey a cuminza wordo bendi desde luna di Februari caba. Asina ciudadanonan por a sigura nan carchi pa e rifa cu ta tuma luga na final di e dia y tin como prome premio, nada menos cu un vehiculo Compact SUV tipo KIA Seltos 2025 completamente nobo, ademas di diesocho otro premio mas. E cantidad di premio mas grandi te cu awo, ta inclui pasashi pa Hulanda, telefon celular, weekend stay na hotel, diferente gift certificates y cash. Cada ticket ta wordo bendi pa 25 Florin.
Durante paradanan di Carnaval a bende mas di 100 buki di rifa. Corda cu tur placa lo bay bek den comunidad. Pasando bon ta brinda e oportunidad tambe na e pueblo di Aruba di yuda recauda fondo cu despues e club ta distribui back na diferente proyecto social; entre nan diferente iniciativa cu ta beneficia esunnan cu mas necesidad, manera adulto mayor y mucha, entre otro.
Shelby Maduro ta invita pueblo di Aruba pa yega cu henter famia pa pasa un dia placentero.
