E situacion di Covid 19 na Aruba ketobay ta preocupante

ORANJESTAD (AAN) – Gobierno a yama un conferencia di prensa Diaranzon mainta, den cual Prome Minister mr. Evelyn Wever-Croes, Minister Dangui Oduber, titular di Salud Publico y Turismo,

hunto cu señora Sharline Koolman, Hefe di DBZ, pa duna un update tocante covid-19 y e situacion di aumento considerable di contagionan.

Minister Presidente a expresa cu e situacion ketobay, ta preocupante pasobra por mira cu e cantidad di casonan ta hopi halto. Tambe, mas y mas ta keda confirma cu omicron ta diferente, locual ta haci cu mester tin un maneho diferente y adapta, compara cu e otro olanan di covid-19, cu Aruba a haya.

“Literalmente no tin ‘one size fix all’ akinan y tur e medidanan cu a wordo aplica den pasado, no por wordo aplica aworaki atrobe. E ta pone cu mester busca e balans constantemente”, Minister Presidente a bisa.

Refiriendo na e cantidad di casonan registra Diamars, e mandatario a indica cu nan ta 1028, di cual 929 ta residente y 99 caso ta no residente (turistanan cu ta drenta y turistanan cu ta sali y ta test) pero tambe nos propio hobennan cu ta studia den exterior y cu ta na Aruba ainda y talvez a test positivo.

Casonan activo tin 3.327 caso aworaki, y e average di casonan nobo pa dia ta na 670, den un lapso di siete dia. E average di positive rate (e grado di esnan cu ta test positivo), ta na 61% na e momentonan aki, den un lapso di siete dia.

E dignatario a subraya, basa riba grafico, cu por mira claramente cu Aruba ta den e di cinco ola. El a recapitula bisando cu e prome ola tabata na Maart 2020, cu a yega na un cantidad di caso activo di 69; e di dos ola tabata esun na Augustus’20 cu a pasa e cantidad di 600 caso positivo; despues, cerando aña 2020 drentando 2021, nos a drenta e ola #3 cu no a peak hopi halto, te na 700 caso maximo, pero el a dura mas largo, cu por bisa cu a wak dos peak den dje prome cu por a sali for di dje. Na Juli di e aña aki, a cuminza e ola 4 cu mas di mil caso. Aworaki, nos ta na esun cu a cuminza na December ultimo, ola #5 cu 3 mil y pico caso. Cu esaki por mira e diferente olanan cu Aruba a haya su mes aden, y con e maneho pa cada un ta diferente.