“Caminda cu nos ta para aworaki, no ta hustifica bin cu medidanan drastico”

Minister Presidente tocante situacion actual covid-19:

ORANJESTAD (AAN) – Minister Presidente, durante e conferencia di prensa di actualizacion encuanto e situacion di covid-19, a referi tambe na e grado di hospitalizacion cu el a mustra tambe riba grafico.

E dignatario a bisa cu e slide aki ta hopi importante, tumando e grado di hospitalizacion solamente for di Augustus 2021 te awo.

El a splica cu e linea cora ta mustra e cantidad di personanan hospitaliza na Aruba. E comienzo di e grafico ta mustra relativamente abao, pero na Augustus, el a peak bay halto. Esaki ta desde Diasabra 21 di Augustus, cu Gobierno a yama un conferencia di prensa pa anuncia toque de queda, for di 10’or di anochi te 5’ or di madruga, pasobra hospital a bati alarma.

“Pero si mira e grado di hospitalizacion, y na e momento ey a exigi di decisionnan masha urgente y drastico di nos, pasobra  hospital a bati alarma. Nos no tabata kier e momento ey pa ningun hende haya un accidente di auto, ni cay, ni tin otro trauma cu e tin cu bay na Hospital, ni cuido intensivo, pasobra UCI tabata hopi, hopi yen, e momento ey”, Prome Minister a bisa.

El a sigui splica tocante e grafico y a bisa cu e linea blou ta indica Cuido Intensivo na Colombia. Manera ta conoci Aruba a manda varios pashent na Colombia e tempo ey, y el a expresa cu danki Dios aworaki tin solamente dos of tres pashent ayanan.

E linea berde, el a sigui bisa, ta Cuido Intensivo na Aruba y ta mira cu ora e hospitalizacion a aumenta e ora ey casonan na Cuido Intensivo tambe a aumenta.

E mandatario a señala cu den e ola # 4 unda cu e peak a cuminza, e situacion na Aruba casi a escala y mester a tuma accion inmediato pa frena esaki.

Aworaki Aruba ta den e ola 5 y na final di e grafico por mira unda nos ta para awo, e dignatario a bisa.

“Caminda nos ta para aworaki, no ta hustifica medidanan drastico manera toque de queda, of medidanan cu mester a tuma na Augustus. Ta importante pa bisa, cu aworaki nos tin 21 persona na Hospital, te cu e cifranan di ayera (Diamars), dos den cuido intensivo y 19 riba piso. Nos capacidad na Hospital aworaki, ta ok, ta bao di control. E ta nos compas, esey ta e guia basa riba consehonan di nos expertonan, te ora cu mester bin cu medidanan mas drastico ”, Prome Minister a subraya.

E dignatario a indica cu aworaki gobierno ta buscando e balansa entre salud y economia, y e ta spera cu por ta exitoso den esaki.