E simpatica Elizabeth Johnson corona como Miss Universe Aruba 2026

ORANJESTAD (AAN): Diabierna anochi na Clubhouse di Tierra del Sol, tabatin e coronacion oficial di Aruba su Miss Universe Aruba 2026.

   A toca honor na Ministro di Turismo, Wendrick Cicilia pa corona e simpatica Elizabeth Johnson como e reina maximo di Aruba.

   Elizabeth no ta un desconoci den mundo di beyeza na Aruba, como cu na 2021 mes caba el a bay cu e titulo di Miss Teen Aruba International 2021.  El a viaha pa exterior den e certamen di Miss Teen Grand 2021, y aki el a sali prome finalista.

   Pero awor e mundo a habri aun mas grandi pe, como cu e tin e corona di Miss Universe Aruba.  Su beyesa puro, cu inteligencia y mucho mas lo ta un impulso perfecto pa e isla aki tin un fenomenal representante den e certamen internacional.

   Elizabeth ta representando Aruba den e di 75 certamen di Miss Universe cu e biaha aki lo ta na José Miguel Agrelot Coliseum na San Juan, Puerto Rico, riba Diamars 24 di November 2026.  Esaki ta di cuatro biaha cu Puerto Rico ta anfitrion di e certamen aki.

   Di Curaçao e candidata cu ta participando ta Bianty Gomperts, y di Bonaire e participante ta Caroline Porras.   E potretnan aki pa cortesia di Ministerio di Turismo.