Banco Central a tuma decision
ORANJESTAD (AAN): Banco Central di Aruba (BCA) a haya importante den fin di siman, pa recorda publico cu articulo 5 di e Landsverordening regeling consumentenkrediet a drenta na vigor riba e fecha di 1 di Augustus 2026.
Articulo 5 y e Regulacion Ministerial di 29 di juli 2026 tocante compensacion maximo y costo di incasso en conexion cu credito di consumidor ta protege consumidor door di impone limite riba cierto costo cu por cobra riba e credito di consumidor. E cantidadnan maximo aki ta aplicabel pa credito di consumidor nobo y credito di consumidor existente cu por ta refinancia, restructura of prolonga despues di prome di augustus 2026.
E nificacion: Pa esnan cu ta puntra loke esaki ta nifica pa consumidornan na Aruba, basicamente e nifica cu si bo persona cera un credito di consumidor, esta un prestamo, bo no por wordo cobra mas di e siguiente costonan maximo:
(1) Interes y otro costo relaciona cu e prestamo (p.e. costo pa cera e credito).
Bo no por haya un cobransa di mas di 25% pa aña. Esaki ta calcula manera e costo total di interes y e costonan relaciona manera un porcentahe di e suma total di e credito di consumidor.
(2) Costo di tardansa di pago.
Si bo persona cay atras pa loke ta cumplimento di pago, bo no por wordo cobra mas di 2% pa luna. E porcentahe aki ta calcula a base di e cantidad di pago cu falta.
(3) Pago trempan.
Si bo persona dicidi di paga e prestamo den un solo biaha of haci un adelanto parcial di e pago, bo no por wordo cobra mas di 7.5% di e suma paga adelanta.
(4) Gasto di incasso extrahudicial.
Si bo cuenta bay incasso, bo no por wordo cobra mas cu e montante permiti segun e tarifa di likidacion aplica pa Corte Comun di Husticia di Aruba, Corsou, Sint Maarten, Bonaire, St. Estatius y Saba. (Tuma nota cu e montante aki ta basa riba 1½ punto di e tarifa di likidacion pa procedimento di e caso den Corte di Prome Instancia y ta depende di e suma principal di e reclamacion. E costonan aki ta inclui, entre otro, costo di recordatorio, costo di notificacion y costo administrativo).
Banco Central ta conseha e consumidornan pa tuma nota di e costonan maximo aki, ora nan ta cera un credito di consumidor. Ademas, BCA lo ta responsabel pa supervisa e cumplimento di e Landsverordening regeling consumentenkrediet, na momento cu esaki drenta na vigor completamente. Ta premira cu esaki lo drenta na vigor desde 1 di Januari 2027.
