E siman aki San Nicolas Business Summit III lo reuni sectornan clave pa un futuro mas fuerte pa San Nicolas

Presidente di SNBA Errol de Freitas:

ORANJESTAD (AAN): San Nicolas Business Association ta presenta San Nicolas Business Summit III (SBS III), bou di e tema “The Common Good” — E Bienestar Comun. E cumbre aki, segun señor Errol de Freitas, Presidente di SNBA, ta un plataforma cu a inicia na aña 2019 pa crea posibilidadnan pa inversion na San Nicolas. E Asociacion mes ta cumpliendo su di 59 aniversario brindando sosten na economia di San Nicolas.

   E evento lo tuma luga diahuebs, 5 di november 2026, di 9:00 di mainta te 2:00 di merdia, na Santa Theresita Convention Center na San Nicolas.

   SBS III ta reuni representantenan di gobierno, Parlamento, inversionistanan y oradornan principal, cu e meta di crea oportunidadnan y contribui na un futuro mas fuerte pa San Nicolas. De Freitas a remarca cu e biaha aki lo tin inversionistanan di Venezuela tambe cu lo ta presente na e cumbre.

   Cu e bienestar comun como punto di salida, e encuentro ta pone enfasis riba e importancia di cooperacion entre e diferente sectornan pa impulsa e desaroyo di San Nicolas. E cumbre ta ofrece un plataforma pa intercambia ideanan y explora posibilidadnan cu por beneficia tanto e comunidad como e sector empresarial.

   Cu e edicion aki, San Nicolas Business Association ta sigui pone atencion riba e potencial di San Nicolas y e importancia di uni esfuersonan pa su futuro. Un San Nicolas mas fuerte. Un miho futuro.